Studium Carpato-Ruthenorum 2015 днесь закінчіть ся

6-тый річник Міджінародной літньой школы русиньского языка Studium Carpato-Ruthenorum 2015 днесь святочно закінчіть ся в пензіоні Átrium в Пряшові. Штуденты дістануть свої діпломы, котры їм будуть припоминати абсолвованя той школы, но на участных чекать і културный проґрам.

На 6-тім річнику літньой школы того року передавали лекції лекторы в складі: ПгДр. Кветослава Копорова, ПгД., Мґр. Марек Ґай, проф. Др. Павел Роберт Маґочій, Мґр. Валерій Падяк, к. н., проф. Др. Елена Будовская і проф. ПгДр. Микола Мушинка, др. н. Лекції были передаваны по русиньскы і по анґліцькы.

На літній школі брало участь 15 штудентів, котры были зо Словакії, Споєных штатів Америкы і Україны. Лекції были передаваны із языка, історії і етноґрафії. Окрім того штуденты в рамках літньой школы навщівили нашы інштітуції, церькви, ці мали можливость взяти участь на творчіх варштатах.

Святочне завершіня обуде ся днесь, 26-го юна 2015 р., од 18.00 год. Тота подія є одкрыта про верейность.

6-тый річник Міджінародной літньой школы русиньского языка і културы Studium Carpato-Ruthenorum 2015 быв підпореный Урядом влады Словацькой републікы в рамках проґраму Култура народностных меншын 2015.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА