Стріча з лекцийом лемківского языка в Радваницях

Перший раз в істориі Основной Школы в Радваницях, што ся находит в польковицкым повіті, лемківскы діти од шкільного рока 2018/2019, в результаті старань родичів, мают можливіст вчыти ся рідной бесіды. Оціна з лемківского языка найде ся на шкільным свідоцтві і врахувана буде до середньой оцін учеників.

Учытельком лемківского языка в Радваницях єст п. Дорота Максимчак, котра з великым заанґажуваньом, пасийом і радістю вчыт діти лемківскых букв і слів, хоснуючы книжкы Петра Мурянкы і языковы словникы, та вказує лемківскы традициі і звыкы. Пані Дорота Максимчак вкладат вельо серця в тото, жебы вчыня было і забавом, зато наймолодшы охочо берут участ в занятях.

19. грудня/децембра 2018 р. прошла миколайково-велийна стріча, яку зачала як раз показова лекция лемківского языка. Уж по трьох місяцях лекций рідной бесіды старшы діти мали нагоду запрезентувати родичам, дідам і властям школы – директорці Боґуславі Нємаш і віцедиректорці Станіславі Тшещ, своі знаня писати та чытати в лемківскым языку. Діти выступили тіж з короткым артистичным проґрамом – співали коляды і рецитували вершыкы навязуючы до різдвяных свят. Того дня не могло і бракнути Святого Миколая, якій, задякы помочы спонсорів, принюс дітям презенты.

Присутны мали нагоду погостити ся і попрібувати традицийных лемківскых велийных страв – кєселиці ци перогів. Вечер скоро минул в приємній і родинній атмосфері, яку створили вшыткы участникы подіі.