Стріча з авторамі фільму «Мій Никыфор» в Креници

В рамках подій, присвяченых 50. річници смерти Никыфора, в середу, 11. липця/юлия 2018 р., о 19.00 год. в Креници проходила стріча з авторамі фабулярного фільму «Мій Никыфор». Перед стрічом фільм был выемітуваний в концертовій сали креницкой Головной Пияльні.

Сценарий фільму оснований на правдивых подіях навязує до остатніх 8 років жытя русиньского примітывного маляря Никыфора (Епіфана Дровняка). Головном темом образу єст істория камаратуваня Никыфора з польскым малярьом Марияном Влосіньскым. Фільмовы кадры были зниманы в Креници, Чырній, Новым Санчы і Пивничній.

На авторску стрічу были приголошены – Йоанна Кос-Краузе, єден з двох режысерів фільму, та акторы Йовіта Будник, Роман Ґанцарчык і Єжы Ґудейко. Оповідали они о кулісах творіня фільму, приватны емоциі і вражыня звязаны з фільмом та одповідали на звіданя прибывшых гости.

– Никыфор од все ходил за мном в голові – бесідувала режысерка – в школі вчыла єм ся о Никыфорі, котрий заінспирувал ня зробити о ним біоґрафічний фільм.

– З паньом Христином камаратували сме на пляні фільму – оповідал Роман Ґанцарчык, граючий ролю Марияна Влосіньского – то была барз добра спілпраца двох акторів. Пані Христина сотворила єдну з найліпшых акторскых креаций в тамтых роках.

Примпомнийме, же головну ролю Никыфора в фільмі заграла польска акторка, яка за ціле артистичне жытя знана была лем з граных по мастерскы епізодів, народжена во Львові, Христина Фельдман.

Треба іщы спомнити, же серия стріч і подій, присвяченых 50. річници смерти Никыфора, єст орґанізувана Округовым Музейом з Нового Санча, а Радийо Руской Бурсы ЛЕМ.фм єст медияльным партнером той ініцятивы.