Стріча ведучых РБ з европейском партийом/орґанізацийом European Free Alliance (EFA)

9. липця 2015 року, ведучий Стоваришыня Руска Бурса др Павел Малецкій, з заступцьом проф. Оленом Дуць-Файфер, стрітили ся з властями европейской партиі і фундациі ЕФА, яка за головну ціль має репрезентуваня меншын в Европейскій Уніі. На стрічу запрошены были тіж Кашебы і Шлезакы. European Free Alliance (ЕФА) то орґанізация, яка стоваришат 40 політычных партий, звязаних з народовыма, або етнічныма ґрупами, стремлячыма ґу нацийональній достоменности, або борют ся про своі права. Окрем того, ЕФА то фундация, в якій сут присутны меншыновы орґанізациі (соспільны і культуральны), котрых інтересы в евопейскым парляменті репрезентує ЕФА. Рух Автономіі Шлеска (RAŚ) уж од 10 років єст членом той орґанізациі. Запрошыня до ЕФА достали тіж Кашебы і Русины. Передставителі ЕФА в особах Olrik Bouma (заступця ведучого) і Georgios (Jorgos) Papadakis (член) представили діяльніст ЕФА і процедуры звязани з його функцийонуваньом. Руска Бурса передала тіж своі лемківскы выдавництва з 2014 рока до бібліотекы ЕФА.

Стріча проходила при нагоді конференциі “Silesia in Europe, Europe in Silesia” в Рыбнику на Шлеску.