Стріча Тылявян в Івано-Франківску

«Рідне село Тылява» – під такым наголовком одбуде ся стріча бывшых жытелів русиньского села Тылява та іх потомных, котра пройде 23. жолтня/октобра т.р. в Івано-Франківску на Украіні. Подія одбуде ся в бібліотеці при ул. Чорновола 22.

Орґанізоторы кличут на стрічу каждого, хто має якій-небуд звязок з Тылявом. Як бесідує спілпрацівничка радиа ЛЕМ.фм, Анна Кырпан: […] гевса стріча то бодай перша того рода стріча на Украіні і в Польщы, де доднес прожывают розшмарены селяне. Тылявяне были в 40. роках ХХ ст. выселяны до Совітского Союзу, а пак тоты, што остали, были в 1947 році насильно выгнаны на тзв. одзысканы землі Польщы. Дальше довідали сме ся од орґанізаторкы,  же […] буде то просто стріча про себе, про свою родину та рідне село. Перше, натурально гейбы стрітят ся Тылявяне, но головно з міста Івано-Франківск, та певно івано-франківской области. Быти може приде і дахто з другых области […], до котрых выселено Лемків з Тылявы. Особы, котры мают дяку взати участ в стрічы, а мают дакы артефакты повязаны з селом, напр. фотоґрафіі, або документы, прошены сут о іх принесіня, цілю ліпшого познаня єден другого.

Тылява то русиньскє село, котре находит ся на граници середньо-східньой Лемковины. Істория села сігат ХV ст., коли то являт ся в 1486 році перша інформация о селі. Од самого зачатку село заселяли Русины, котры аж до 40. років ХХ ст. были автохтонами Тылявы і другых поблизкых сел. За Шематизмом Всего Клира Руского-Католического Богом спасемой Епархіи Перемышльской на годъ отъ родж. Хр. 1879 , в селі прожывало 1022 грекокатолицкых вірных. Дальше за Шематизмом з 1909 рока чытаме, же село чыслило 1124 грекокатоликів, 15 римокатоликів, та 24 Жыдів. Початком ХХ ст. в селі находила ся 2-клясова етатова школа з двома учытелями, котрой выкладовым языком был рускій. Чысло вірных в селі змінило ся в 1926 році, коли то в рамках тзв. тылявской схізмы скликано віче, на котрым місцевы парохіяне та сусідні з Терстяны заповіли выхід з грекокатолицкой Церкви і прилучыня до православной. Подія одбыла ся 16. листопада/новембра 1926 рока. Для православной церкви доднес Тылява остає символом великого руху конверсий, котрий зачал ся в тым же селі. В вересни/септембрі т.р., на місци, де стояла пізнійша православна церков Рождества Пресвятой Богороциі, в каплици побудуваній в роках 2008-2009 одбыли ся празднуваня з нагоды «90. річниці повороту Лемків до православя». Окрем реченой каплиці, в селі днес находит ся і грекокатолицка церков Рождества Пресвятой Богороциі з 1787 рока, котру днес хоснує римокатолицкій Костел.

фот. горі: фалаток карты села з 1851 р.; джерело: Державний Архів в Перемышли