Стріча Конечнян

2017 рік про Русинів з Лемковины буде роком смутным, понеже припоминати собі будеме 70. річницю злочыну Акциі Вісла. Але окрем задумы над минулым та поклоніня ся жертвам выгняня, є то тіж рік, котрий дає можніст внутрнішьой рефлекциі, подумати над тым, якым путьом ідут днес Лемкы по долгых роках вынятя спід права, де находит ся днес іх місце і што остало по автентичній Лемковині. Прото же першом з ініциятив, котра уж явила ся в плянах на 2017 рік, є стріча бывшых і сучасных жытелів русиньского села Конечна, котре подібні як вельо другых сел днес єст границьом не лем медже Польщом і Словацийом, але предовшыткым медже історичном Лемковином і Пряшівском Русю.

Конечняне в звязку зо смутном річницьом выгняня, почувают обовязок засвідчыти, же днес дальше іх село істнує і є оно лемківскым. Зато, уж о піл рока, в днях 21. – 23. липця/юлия т.р. рыхтуют ся зыйти до новоодреставруваной бывшой сельской школы. Орґанізаторы кличут вшыткых, котры мают повязаня зо селом Конечна. В плянах, окрем молитвы за родаків і жертвы Акциі Вісла, передвиджено стрічу, на котрій не бракне істориі і споминів про село. Цілю контакту в справі стрічы Конечнян, мож контактувати ся з Андрийом Ксеничом (+48 608 45 42 46) та шолтысом села – Петром Болдысьом (+48 512 181 666). Про хоснувателів Фейсбука, мож долучати до подіі за тым мотузком.

Як спомнено горі, стріча одбуде ся в бывшій школі, котра днес фунґує як сельска світлиця. Школа завдякы фінансовій підпорі ґміны Устя Рускє была влони доцяп одремонтувана, а не так давно (14. січня/януара – в ден памтяти св. Василия Великого) – торжественно посвячена. Подія была повязана з місцевым парохіяльным кєрмешом, на котрий окрем місцевого пароха о. Аркадия Баранчука, пришли священникы з Крениці, Бортного та сусіднього Бехерова, находячого ся на Пряшівскій Руси. По Божескій Літургіі вірны і запрошены гості, в тым чыслі війт ґміны Устя Рускє Димитрий Рыджанич та староста ґорлицкій Кароль Ґурскій, взяли участ в посвячыню одреставруваной школы. Будинок был побудуваний в 1926 році за приватны грошы селян і до 1947 рока служыл як школа для многых русиньскых діти. По 1956 році, коли декотрым родинам подарило ся вернути до села, дальше діти до ней ходили, аж в пізнійшых роках была заперта. Дотепер стояла як нехоснуваний будинок. Як твердит війт Рыджанич – коло школы в плянах є поставліня дакого задашеного ватровиска, де мож бы было в літній час ся стрічати.

На посвячыню конечняньской світлиці прусутна была єдна з локальных телевізий. За тым мотузком мож пізрити на материял з подіі.

фот. горі: Фейсбук