Стоп ксенофобіі і пошырюваню ненависти взглядом Лемків

Послідні дни значат ся чорныма хмарами над ситуацийом лемківской меншыны в Польщы. Перше ганебный комунікат з 28. листопада/новембра тр. зо страны Інституту Нацийональной Памяти, пак шкідливый допис опубликуваный на портали wp.pl, жебы скінчыти на омерзлым выступліню посланця Ґжеґожа Брауна.

Подля Інституту Нацийональной Памяти акция «Вісла» была для Лемків выбавліньом, бо охоронила ім здоровля, аж і жытя, а выселенці на місци нового оселіня отримали палацы – то так в великым упрощыню, і тривіялизучы. Дрібницьово з фальшывыма стверджынями поміщеныма в комунікаті ІНП розправили сме ся в дописах «В обороні історичной правды» i «Кедь є склероза миліша приятелька». Зо становиска ІНП мож вытягнути, што Лемкы лишыли біду і пішли до ліпшого, а тото, в дальшым розрахунку, дає наступным борцям арґументацию, же вшелеякы стараня о зворот маєтків, рекомпенсаты для депортуваных сут безосновны…

І в тот спосіб переходиме до допису з 4. грудня/децембра тр. авторства П. Фіґурского і П. Словіка пн. «Piąty rozbiór Polski» опубликуваного ориґінальні на сайті wp.pl, пак передрукуваного на ріжных нацийоналистичных порталях і опрацуваного на нацийоналистичных каналах в сервісі YouTube.

Є то обшырный допис, в котрым авторы доказуют, што м.ін. Лемкы гуртово і масово отримуют лісы, як рекомпенсату за маєток страченый по ІІ світовій войні, што в остатніх роках доходит до «дикой реприватизациі», што заанґажуваны сут в тото політикы ріжного рівня і што ґенеральні, за вынятками, стараня о зворот сут безосновны. Што заскакує, то проф. Ева Лентовска, бывша судя Конституцийного Трибуналу і омбудсманка, специялистка м.ін. в обшыри прав чловека, своім авторитетом підтверджат тезы в статі, стверджат іщы, же не може быти так, што «мітичне право власности буде спричыняло, же в 2023 р. будеме платити за тото, што діяло ся 80 років тому»…

Найбарже пошкодуваны з цілой «аферы» вырастают Державны Лісы, котры вырубали сформууваня о «пятым поділі Польщы». Toто зас трафило на вроджайный ґрунт – є водом на млин для ультраконсерватисты посланця Ґжеґожа Брауна, котрый – не перебераючы в словах, вчас пресовой конференциі 5. грудня/децембра тр. зорґанізуваній в Соймі ПР праві же выкрикувал, як то Лемкы розграбуют Польщу, а скорше мордували Поляків.

Стоваришыня «Руска Бурса» в Ґорлицях не могло остати обоятным на обелжывы слова скєруваны до нашой меншыны. Долов публикуєме писмо, котре было переслане м.ін. до Маршалка Сойму, Омбудсмана ци Осередка Моніторуваня Расистовскых і Ксенофобічных Заховань.

Стоваришыня не лишыло тіж справы комунікату ІНП. В реакциі на него, згідні з правныма процедурами, Стоваришыня «Руска Бурса» в Ґорлицях та Стоваришыня Лемків выступили до Комісиі Гоніня Злочынів проти Польскому Народови з внесками о доручыня постановлінь o ремісиі слідства в справі рішыня о акциі «Вісла», жебы пак мочы зложыти на речене постановліня зажаліня. Не знатя ци Комісия Гоніня Злочынів проти Польскому Народови возме до увагы речены внескы, зато што оба Стоваришыня не сут страном в поступуваню, лем Обєднаня Лемків і Обєднаня Украінців в Польщы.

Фурт ждеме на реакцию представників лемківской етнічной меншыны в Спільній Комісиі Уряду та Нацийональных і Етнічных Меншын. В одповіди на наше писмо в тій справі з дня 5. грудня/децембра тр. отримали сме такой одраз зворотну інформацию, што проф. Штефан Дудра і др Мирослава Копыстяньска роблят над писмом до ІНП, а тіж же справу хотят представити на засіданях СКУтНіЕМ.