Стихы Александра Духновича і горнятко з молоком – «Говорить Пряшів» – пятниця, 20.00 год.

Радийо Русин.фм з Братиславы як каждый тыжден приносит процийку вісти о плянуваных культурных подіях і роботі русиньскых інституций – музею, театру і ансамблю Пульс.

В Книжници.фм бібліотекар Ігор Латта буде чытал стишкы Будителя Александра Духновича.

При нагоді Русиньска Оброда на Словациі і село Біловежа запрашают на суботу, 8. червця/юнія 2019 р., до Біловежы на фестіваль під назвом «Свято русиньскых будителів Александра Духновича і Александра Павловича».

Целебритом того тыжня буде Ізмаіл Іванович Срезневскій – славіста, філолоґ, етноґраф, професор петерсбуржского університету, котрый писал і о Русинах.

Петро Медвід в Перличках прочытат статистикы з 14. червця/юнія 1943 р., якы были надрукуваны в підкарпатскій ґазеті «Неділя», пн. «Простір зеселяня, домы, набываня і чысло сел Підкарпатя».

Теодизия Латтова в Припоминці про корову – калину, котра давала смачне молоко. Пило ся го з горнятка, а на ґамбі оставали білы баюсы.