Стащіньскый музей уж привітав навщівників. Суть в нім унікаты

Сельскый музей в Стащіні, Сниньского окресу, быв офіціално одкрытый у невембрі 2020-го року, коли одбыли ся святкованя ослободжіня села. Но з епідемічных причін першых навщівників привітав аж в місяці апріль того року, кедь ся увольнили обмеджіня.

Наповнити ідею сельского музея, котрый презентує жывот в тій области, ся Стащіну подарило по приблизно семох роках. По неуспіху із жадостьов о дотацію на його реконштрукцію зберали історічны артефакты і реконштруовали нехосновану сельску будову самопомічно.

Як про аґентуру TASR повів староста Стащіна Мірослав Бобер, котрый є і ініціатором думкы зробити сельскый музей, векшый інтерес о історічны артефакты з боку навщівників очекують почас літньой сезоны.

Каждый артефакт має свою історію, мають унікаты

„Цілый музей сьме робили може пять років. Вшытко сьме собі робили самопомічно і лем за сельскы грошы в рамках можливостей, по кус. Артефакты сьме зберали двоми, Мірослав Бураль і я,“ повів про аґентуру Бобер з тым, же автентічны ужытковы предметы їм люди із Стащіна і сел околіці давали радо безплатно.

Єдине, за што заплатили, была машынка на шытя, котра їх подля Бобера вышла на пять евр. Як підкреслив, збірка добовых артефактів їм росне безперестайно. В сельскім депозітарі мають і цілу деревяну хыжу із Тополі з унікатным сліпым комином, ці ковальскый пец із Колбасова, котрый є з року 1898.

Кедьже Бобер на здобываню музейных експонатів прямо брав участь, з каждым з выставленых предметів має повязану свою історію. Артефакты, котрых суть стовкы, документують войнову історію половины 20-го столітя, період узкоколяйовых штрек, жывоты жытелів позначены будованьом Старины і простый жывот містных.

Кедьже векшына ужыткового серсаму робила ся з дерева, легко доступного матеріалу, їх обмеджена доба тырваня з многых робить унікаты. Меджі такы належыть і свадбляна каста із зачатку 19-го столітя. „Такы артефакты не найдете в жаднім музею,“ говорить староста.

Пережыли войны і бандерівців

„Дотулили ся нас штири войны. Першов была Перша світова война, другов была такзвана Мала война меджі Мадярьском і Словакійов (мадярьско-словацькый конфлікт в 1939-ім році, позн. ред.), третьов была Друга світова война і четверта была проти бандерівців,“ пояснив Бобер, чом часть експозіції в сельскім музею є присвячена войновій історії.

Векшыну артефактів з Першой і Другой світовой войны, котрыма презентують обидві воюючі стороны, пожычів селу містный Клуб воєньской історії Годошік.

Будова, в котрій є музей, збудовали в році 1939, коли Стащін став частьов Мадярьска, і служыла фінанцам. По 1945-ім році служыла як поліцайна станіця, пак як станіця комуністічной „верейной безпечности“.

В 1990-ых рока в ній была засідалня сельского уряду і клуб пензістів, нехоснована была довгый час аж до взнику музея. Стащіньскый сельскый музей є одкрытый в середы і пятніці, но робітници сельского уряду привітають навщівників і в іншы дні.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА