Стариньскій з нагородом ім. Юрґена Ґретшеля

Основатель і ведучый Лемківского Ансамблю Пісні і Танця Кычера з Ліґниці, Юрий Стариньскій, в четвер, 10. жолтня/октобра 2019 р., одобрал з рук президента Ліґниці нагороду ім. Юрґена Ґретшеля – Шлезскє небо. 

Оцініня было признане за діяльніст і плеканя культуровой спадковины жытелів Нижьного Шлеска. Нагороду передано вчас святочной ґалі, яка проходила в просторах ліґницкой Рыцарской Академіі.

Оціненый за підтримуваня культуры

Тогорічным лавреатом выбрано як раз Юрия Стариньского, ліґницикого діяча головно в обшыри лемківской меншыны, занимаючого ся ведіньом ансамблю Кычера – фольклорного колективу, котрый презентує лемківску культуру. Нагороду на рукы лавреата передал в Королівскій Сали президент Міста Ліґниці, Тадеуш Кжаковскій. Вчас подіі на сцені з концертом выступила ведена Стариньскым ліґницка Кычера.

Премія під назвом Шлезскє небо Юрґена Гретшеля то оцініня, котре признавне єст за осягніня в обшыри охороны культуровой, материяльной і нематерияльной спадковины Нижнього Шлеска, в тым головно Ліґниці і околиц та за діяльніст для толеранциі, взаімной пошаны, спілпрацы, пошануваня інчых люди і покріпляня меджекульторово діялоґу.

Юрий Стариньскій ансамбль Кычера основал в 1991 р. головно з членів тзв. західньой ґрупы ансамблю Лемковина з Білянкы. Скоро ґрупа зачала выступувати на сценах цілой Польщы, Европы і світа. До ансамблю тепер приналежыт наступне поколіня молодых Лемків, народженых на чужыні. Стариньскій завершыл студиі з істориі, єст аніматором культуры і соспільным діячом. Працує в Лічницкым Центрі Культуры – завідує Одділіньом Фольклору, Нацийональных Меншын і Документациі. В рамках діяльности колективу Кычера был думкодавцьом Медженародного Фольклорного Фестівалю Світ під Кычером, в рамках якого на сценах Нижнього Шлеска і Малопольщы презентуют ся ансамблі з цілого світа. Єст автором ріжных публикаций на лемківску тему.

Юрґен Ґретшель

Особа, котром названо признавану нагорода, то Юрґен Ґретшель, ліґницкій Німец, котрый вродил ся в 1941 р. По войні його родина не была выселена з Ліґниці. Польскє громадянство было му признане аж в 1971 р. Попри тым надале был під надзором комуністичной безпекы. В році 1991 основал Німецкє Соспільно-Культурне Товариство в Ліґници. Занимал ся популяризацийом істориі і культуры Німців на ліґницкій земли. Был єдным з покріпителів польско-німецкого поєднаня. Вмер в Ліґници в 2016 р.

фот. Войцєх Обремскій; Ліґницкій Центр Культуры / Facebook