«Спомний собі Лемку» – Штефанія Гайтко з Перункы, ІІ част бесіды – віторок, 20.00 год.

Згідні з заповідями з попереднього одтинка проґраму «Спомний собі Лемку», днес запрашам на другу част бесіды з п. Штефанійом Гайтко (з д. Олеснєвич), котра народила ся в 1925 році в лемківскым селі Перунка. Награня, ведене Оленом Дуць, было споряджене в грудни/децембрі минулого рока. З попередього інтервю дознали сме ся цінных інформаций про рідне село, про реліґійний поділ, школу та запознали сме ся з назвами штоденного нарядя. Было тіж о роботах в поли, робліню леняной оливы, вечырках та о родинных пережытях п. Штефаніі. Бесіда доторкнула ся тіж злочыну Акциі «Вісла».

В днешній части дознаме ся про традицийне перунчаньскє весіля, кєрмешы, а тіж про поломництва на Пряшівску Русь до села Люцина. Хоц Різдво уж за нами, почуєме про лемківску велию і звыкы з ньом звязаны, а же Пасха іщы перед нами, буде при нагоді про великодні свята. Попри тым, почуєте свобідну бесіду про штоденне жытя на Лемковині і не лем. Хоц повело ся ім вернути на рідну Лемковину, то доля справила, же днес прожывают на чужыні.

«Спомний собі Лемку» то проґрам, в котрым можете почути цікавы річы про минуле, про рідну Лемковину, але і жытя на чужыні. Інтервю ведены молодым чловеком, дают надію старшым його бесідникам на ліпше заран для лемківского народу.