«Спомний собі Лемку» – Штефанія Гайтко з Перункы, І част бесіды – віторок, 20.00 год.

Новорічний проґрам «Спомний собі Лемку» зачынаме од циклю бесід, котры сут ведены вынятково Оленом Дуць. Будут то свіжы бесіды, награны з людми, котры барз добрі памятают Лемковину сперед 1947 рока. Форма остає подібна до той, котру вюл редактор Севериян Косовскій.

Днес, інтервю з п. Штефанійом Гайтко (з д. Олеснєвич), котра народила ся в 1925 році, в селі Перунка на західній Лемковині. В першій части дознаме ся цінных інформаций про рідне село, про реліґійний поділ, школу та запознаме ся з назвами штоденного нарядя. Буде тіж о роботах в поли, робліню леняной оливы, вечырках, та о родинных пережытях п. Штефаніі. Наконец, почуєме спомины, тыкаючы ся выгнаня на захід Польщы в 1947 році.

На знимці горі православна церков покровы свв. Космы і Даміана в Перунцці (уж неістнуюча). А за  тым мотузком можете пізрити на обшырну ґалерию знимок грекокатолицкой церкви свв. Космы і Даміана, котра днес служыт як рымокатолицкій костел.

«Спомний собі Лемку» то проґрам, в котрым можете почути цікавы річы про минуле, про рідну Лемковину, але і жытя на чужыні. Інтервю ведены молодым чловеком, дают надію старшым його бесідникам на ліпше заран для лемківского народу.