«Спомний собі Лемку» – І част бесіды з Євгенійом Ковальском (з д. Габура) з Фльоринкы – четвер, 21.00 год.

В днешнім «Спомний собі Лемку» вернеме до славной Фльоринкы. Вернеме зато, же уж пару раз в ефірі лем.фм мали сме змогу чути інтервю з жытелями того же села. Але вернеме до Фльоринкы тіж зато, же днес будеме бесідувати з п. Євгенійом Ковальском (з д. Габура), котра народила ся в 1926 році і барз добрі памятат рокы свойой молодости. Попри тым, в своім жытю – як на молоду жену – перешла барз вельо, зато і бесіда є інтересуюча, не лем під взглядом особистых споминів, але і історичных досліджынь.

В першій части дознаме ся загальных інформаций про Фльоринку – столицю Руской Народной Республикы Лемків. Было то бодай найвекше русиньскє село на західній Лемковині, в котрым містили ся дві церкви, фунґували вшелеякы майстерні і інчы варштаты. Бесіда доторкне ся і того  найгіршого періоду – выселінь 40. років ХХ ст.

Вшытка родина п. Ковальской, мама, братя і сестры пішли на Украіну. Она сама остала в рідным краю, м. ін. зато, же выдала ся за шугая з Баниці – разом рішыли спільні ґаздувати на Лемковині. Більше дознате ся, слухаючы першу част нашой бесіды, котру веде Олена Дуць. Друга уж неодолга – слідте!

«Спомний собі Лемку» то проґрам, в котрым можете почути цікавы річы про минуле, про рідну Лемковину, але і жытя на чужыні. Інтервю ведены молодым чловеком, дают надію старшым його бесідникам на ліпше заран для лемківского народу. Сес проґрам то поворот до втраченого лемківского щестя.