«Спомний собі Лемку» – І част бесіды з Анном Поручник з Білцаревы – середа, 20.00 год.

В днешнім «Спомний собі Лемку» продoлжаме зачату початком рока серию бесід веденых Оленом Дуць. Днес вечером в ефірі радия лем.фм почуєте першу част інтервю з п. Анном Поручник (з д. Федорчак), народженом в 1926 році в селі Білцарева на західній Лемковині. На чужыні п. Поручникова прожыват в селі Чмель на Нижнім Шлеску, недалеко Любіна.

Тото, же Білцарева было значучым селом на мапі Лемковины – вшыткы знаме. Білцарівска земля дала русиньскому народови вельо выдатных особистости, напр. Методия Трохановского (автора першого лемківского букваря), Семана Трохановского (посла до галицкого сойму), о. Димитрия Хыляка (міністра в Верховній Раді Лемківской Руси), поетів Нестора Репелу, Семана Мадзеляна ци Івана Горощака. Не можеме забыти на жыючы іконы днешньой Білцаревы – братів Ярослава і Петра Трохановскых, або Ярослава Горощака, автора першого лемківско-польского і польско-лемківского словника. Попри тым, Білцарева дала Лемковині інчых меньше знаных, талантливых люди про котрых м.ін. дознаме ся в днешнім інтевю. Спомну іщы на п. Ольгу Череп, котрой незабыты співанкы можеме днес одтворювати з книжкы Співанкы бабы Ольгы (выд. Кычеры).

З некотрыма особами з выміненого горі спису мали сме змогу бесідувати в нашым радию. Думам, же днешнє інтервю буде цікавом можністю порівнаня оповідань про рідне село Семана Мадзеляна  і Укача Вожняка.

«Спомний собі Лемку» то проґрам, в котрым можете почути цікавы річы про минуле, про рідну Лемковину, але і жытя на чужыні. Інтервю ведены молодым чловеком, дают надію старшым його бесідникам на ліпше заран для лемківского народу.