Спомины з фронту під Смереківцьом – середа, 20.00 год.

«Сонечна аура спричынила, што вшыткы мали добры гуморы. Нихто не мал понятя, што в Карпатах доцяп перестано старати ся освободити Перемышль, а Росияне вшыткыма силами хотіли перервати карпатскій фронт, в чым осягнули значучы поступы. (…) Пополудни більша част полку, котрый стацийонувал в долині Білянкы, мусіла машерувати під гору до місцевости Лося, де першый баталіон дотер уж скорше, переходячы Ропу.»

То фраґмент незнаных споминів жолнірів Осмого Маршового Баталіону, якы были одчытаны на Медженародній Конференциі Зимова война в Бєщадах 1914-1915. Слідами Бєщадскых Левів, котра прошла в днях 25.-26. марця 2019 р. в Tисній. Територияльный засяг представленых тем не ограничыл ся єднак лем до спомненых Бєщадів, але обнял тіж велику обшыр Низкого Бескіду, в тым – Лемковину.

Просиме выслухати першу з прелекций выголошеных вчас конференциі, а зрыхтувану др Аґнєшком Бук з Ряшівского Університету разом зо студентами. На антені радия ЛЕМ.фм будеме постепенно ретрансмітувати поєдны доповіди. Днес просиме на 20.00 год.

Фот. горі: Лемківскій Пресовый Архів, про більше знимок зо Смереківця з років 1914-15 зарийте на сайт архіву lemko.pl