Співочы варштаты «Музычна вандрівка по Лемковині»

Мазярска Загорода в Лоси, яка єст одділіньом Музею Дворы Карвациянів і Ґладышів в Ґорлицях, просит на музычну вандрівку по Лемковині. Так называют ся співочы варштаты, якы будут проходити 27. січня/януара т.р. в Ґалериі Штукы Двір Карвациянів в Ґорлицях.

Варштаты поведе Юлия Дошна, лемківска піснярка з Лоси. Вчас варштатів буде мож навчыти ся традицийных лемківскых співанок, передаваных м.ін. в устній традициі, якы становлят головну част репертуару пісняркы. Юлия Дошна шыроко знана єст в Польщы, концертує тіж заграницьом. Єй характеристичний спів, міцно переполнений емоциями, мат своіх любителів серед лемківской і польской публикы. Ю. Дошна выдала 10 платен. Спілпрацує з джазовыма, клясичныма музыками та інчыма артистами захопленыма лемківскым фолкльором. Тепер концертує з лютнистом Антонийом Пільхом, презентуючы співанкы зобраны знаным польскым фольклористом – Оскаром Кольберґом. Єден з остатніх спільных концертів Ю. Дошны і А. Пільха проходил 8. січня/януара в церкви в Брунарах. Артисты выконали давны польскы і лемківскы різдвяны пісні і коляды.

Спілорґанізатором варштатів Музычна вандрівка по Лемковині єст Осередок Культуры Ґімны Ґорлиці одділіня в Білянці. Початок варштатів то 17.00 год.

Охочы прошены сут о контакт на майльовий адрес: zagroda.maziarska@gmail.com або під но тел. 601 411 590.