Спільнота памяти – Чертіжне

В пятницю, 28. квітня/ апріля 2017 р., зачали ся лемківскы упамятніня в 70. річницю Акциі Вісла. До неєствующого днес села Чертіжне пришли потомны бывшых жытелів села з родин Мадзелянів, Михнєвичів і Даляків, запрошены представникы державных власти, в особі Андрія Стефаньского, высланника омбудсмана.

Пришли делеґациі Русинів з Америкы – Мария Сільвестрі, Джон Ріґетті, Катерина Сільвестрі, з Підкарпатской Руси  -Валерий Падяк з Ужгорода (професор пряшівского університету), Миколай Бобинец – член Світовой Рады Русинів за Украіну та Юрий Шыпович – редактор часопису “Отцюзнина”, а дале з Пряшівской Руси – писменничка Людмила Шандалова з мужом Владиміром Шандалом і Петро Медвідь з Пряшова – шефредактор ІнфоРусина. В упамятнінях взяли участ делеґациі Лемків, котры пришли з чужыны, зо Заходу, і тоты, котры днес жыют в Горах.

На початку подіі од імене орґанізаторів присутных повитала Олена Дуць-Файфер. В вводным слові повіла м.ін.: ани сел, ани люди, ани іх культуры, ани іх памяти, ани іх сердец так легко знищыти ся не даст… 70 років тому зачала ся наша депортация, депортация нашых предків… але наша прото, же несеме в собі ціле тото выгнаня. Оно ся не скінчыло, оно єст до днес, але же вертаме, то значыт, же сме.

По тых словах о. Ярослав Чухта, парох грекокатолицкой парохіі в Высовій, і о. Ярослав Мадзелян, монах – студита зо Львова, котрого рід з Чертіжного, одслужыли панихіду за жертвы Акциі Вісла.

В селі Чертіжне находила ся грекокатолицка церков Архістратига Михала з 1791 р. зруйнувана в 1952 р по выселіню Лемків. 

Долов поміщаме обшырну фотореляцию авторства Петра Балаыґы, котрому красні дякуєме за присланя знимок на адрес редакциі ЛЕМ.фм.