Спільне засіданя зарядів Стоваришыня Лемків і Стоваришыня Руска Бурса

В суботу, 23. січня/януара 2016 р., в Ліґници одбуде ся спільне засіданя зарядів Стоваришыня Лемків і Стоваришыня Руска Бурса. Ініцияторком той стрічы єст др габ. Олена Дуць-Файфер, будуча в обох орґанізациях заступником головного ведучого.

Як подає Олена Дуць-Файфер, на порядку засіданя буде представлена листа рішынь і справ, на котры оба стоваришыня мают інчий пункт пізріня, або не сходят ся в підході ґу деякым проблемам. Попри тым, на засіданю буде бесіда о можливости такого рішаня, жебы в будучым прібувати  елімінувати деякы несхідны пункты обох орґанізаций, предовшыткым в стратеґічных для лемківского середовиска обшырях. Добесідуваны мают быти спільны проєкты, ведены довєдна членами обох орґанізаций.

Зо стороны ведучого заряду Стоваришыня Руска Бурса будут представлены пропозициі, котры тыкают дальшой участи представників РБ в роботах Світового Конґресу Русинів та меджеконґресовых засідань Світовой Рады Русинів і єй комісий.