Сознательны Перегримчане дбают на тепло в Рускій Бурсі

Не знаме, ци інчы бы ся так одважыли. Шак дати лем штоси на ґорлицку Руску Бурсу то не така проста справа. Добрі, же Перегримчане свідомі до справы підышли.

Рекомендуєме іти тым самым путьом. Найліпше деревце рубати і дакє дровно шмарити до бурсяной котловні, бо ґаз дорогій.

Ждеме в першій черзі на доказ патріотизму од тых, што выбороли своі прадідівскы лісы. Бандурок і карпелів уж маме дост.

Лем най бы ся заряд бурсы взял за роботу і розослал тоты одозвы по нашых селах. На Пряшів тіж выпадат послати, они там богаты.

КОТРЕ СЕЛО ПОСТУПИТ СЛІДАМИ СОЗНАТЕЛЬНЫХ ПЕРЕГРИМЧАН?

Зазначаме, же не лем бандуры належит зберати, але можна и инны продукты, а головно дерево. Шмарме по одном дровні, – а тепло буде нашим воспытанникам.

***

Редакция додає, што одержує численны писма с ріжных сел, в котрых дописователі доносят, же люды охотно поспішат с жертвами на бурсу в Горлицах, лем треба, штобы заряд бурсы росослал по селах писменны отозвы, адресованы до поодынокых наших людей, або до сельскых организации. Тоты люды, котры достанут отозвы, доберут до себе ище двох, трох и с нима составлят комитет, котрый займе ся збором пожертвовань.