Соймова промова Михала Бачыньского – віторок, 20.00 год.

Михал Бачыньскій вродил ся в 1884 році. Скінчыл правничы студиі. В роках 1918-1920 борол ся з большевіками по стороні “білых”, як доброволец в арміі Антона Денікіна. По войні остал урядником в дирекциі мыта во Львові. Был значучым русиньскым діячом, од 1921 рока был членом Галицко-Руской Народной Орґанізациі, а од 1923 рока Руской Народной Орґанізациі. Был спілосновательом Селяньского Союзу (1926 р), котрий в 1928 р. был переформуваний на Руску Аґрарну Партию (полна назва то Руска Аґрарна Партия Земельных і Безземельных Селян в Польще). Был політыком староруской орієнтациі. Своі ідеовы погляды окрислял як правицьовы.

8. грудня 1933 року в Саноку, на зъізді Руской Аґрарной Орґанізациі, при присутности праві 200 делеґатів з ґорлицкого, ґрибівского, коросняньского, ясельского, сандецкого, саноцкого і ліского повітів, покликано Лемко-Союз. Михал Бачыньскій выголосил товды проґрамову промову. Головныма його постулятами были – выокремліня для Лемковины грекокатолицкой єпархіі, свобідной од украінізацийных влиянь перемышльской єрархіі, як тіж заперестаня пошырюваня шкідливой аґітациі в школах і церквах.

За причыном політычной діяльности Михала Бачыньского, при спілучасти найвызначнійшых лемківскых діячів, введене было в школах на Лемковині вчыня руского (лемківского) языка. Паралельні орґанізувана была Апостольска Адміністрация Лемковины.

Михал Бачыньскій был політыком, котрий актывно спілпрацувал з польскым урядом. Был выбраний до Сойму ІІІ кадениці з округу ч. 49. котрий обнимал – Самбор, Старий Самбор, Ліско, Рудкы, Мостиска і Городок, як член зъєднаня ББСзУ (Bezpartyjny Blok Współpracy z Rządem) за причыном попертя, якє признала йому Руска Аґрарна Орґанізация. В Соймі репрезентувал і Русинів з Лемковины. Од 1935 р. был урядовым комісарьом Народного Дому во Львові.

По поліцийных пацифікациях, котры выкликаны были террористычныма діянями Украіньской Войсковой Орґанізациі, на засіданю адміністрацийной комісиі Сойму дня 21. січня 1931 рока выголосил промову, котру днес цілу припоминаме.

Украіньска Войскова Орґанізация за тоту промову засудила Михала Бачыньского на смертну кару.