Сотворене Енді Варгольом лоґо Apple – выставлене на аукцию

На аукцию трафил наступний твір ґенія русиньского походжыня – Енді Варголя. То образ представляючий лоґо популярной електронічной маркы Apple. Варголь заінспірувал ся брендом по тым, як Стів Джобс єдного разу подарувал му компутер з сериі Макінтош. 

Образ датуваний є на 1985 рік, хоц точны обставины його повстаня не сут знаны. Знавці припущают, што міг він быти вытворений на замовліня специяльной комісиі Apple, яка занимала ся реклямом. Варголь, як звізда модерной культуры, міг безсперечно спомочы фірму в промоциі єй продуктів. Образ надрукуваний є на картоні. Представлят фірмове лоґо Apple та напис Macintosh, a до того в вышнім правым углі підпис короля поп-арту. 

Твір є тепер выставлюваний на аукциі. Його мімінальну ціну окрислено на 5 тис. дулярів, а ліцитация має зачати ся 1. лютого/фебурара 2018 р. За аукцийом мож слідити, позераючы на тот мотузок.

фот. аукцийний дім Woodshed Art Auctions