Сополиґа абдіковав

Як інформовав в пятніцю 28-го октобра 2016-го року председа Округлого стола Русинів Словенська Мілан Піліп (ОСРС), в тых днях дістав од нового ґенералного директора Словацького народного музею Браніслава Паніса повідомліня, же директор Словацькго народного музею – Музею україньской културы у Свіднику Мірослав Сополиґа абдіковав зо свойой функції.

О увольніня зо свойой функції Сополиґа пожадав ку дню 31-го октобра 2016-го року. Вєдно з тым пожадав о скінчіня робочого одношіня у свідницькім музею ку дню 31-го децембра 2016-го формов договору, з чім быв ґенералный директор Браніслав Паніс согласный. Паніс Піліпа інформовав на основі того, же председа ОСРС пожадав ґенералного директора о стрічу, на котрій хотів рішыти заключіня конференції, котра проходила в апрілю 2016-го року в музею во Свіднику, якы были силно протирусиньскы. Паніс втогды інформовав Піліпа, же Мірослав Сополиґда є на мародці, і стріча ся доїднать по його навернутю до роботы.

Мілан Піліп іщі 30-го авґуста 2016-го року подав на Ґенералну прокуратуру Словацькой републікы в Братіславі оголошіня о переступліню закона. Оголошіня дотуляло ся конференції, котра проходила 8-го аж 9-го апріля 2016-го року в Словацькім народнім музею – Музею україньской културы в Свіднику, яка принесла протирусиньскы заключіня. Піліп подав оголошіня о переступліню закона на незнамого переступника. Но вєдно з тым загнав і писмо втогдышньому ґенералному директорови Словацького народного музею Вікторови Ясаньови, в котрім жадав одкликаня директора Словавького народного музею – Музею україньской културы в Свіднику. Ясань ся од резултатів конференції, якы не суть в згоді з меншыновов політіков Словацькой републікы і Словацького народного музею, діштанцовав.

Піліп подав оголошіня як пріватна особа. Каждый жытель має право, а докінця обовязок, подати на прокуратуру таке оголошіня, покля знать о даякім переступліню закона. Мірослав Сополиґа нераз публічно сам выступав проти Русинів. На пресконференції 26-го децембра 2011-го року в Ужогороді бісідовав, же русиньскый рух є лем дакілько псіхічно хворых особ, што вєдно з переписом і авдіозаписом публіковав портал zakarpattya.net.ua. Сополиґа ся од протирусиньскых заключінь апрільовой конференції, якы не суть в згоді з народностнов політіков Словацького народного музею, ани зо словацьков леґіслатівов, котра вызнавать Русинів як окрему народностну меншыну, не хотів діштанцовати, навспак, ґенреалному дирекрторови Словацького народного музею написав, же іде о науковы факты.

До відома Мілан Піліп загнав спомянуты матеріалы Еріці Юріновій, председничці Выбору Народной рады Словацькой републікы про людьскы права і народностны меншыны, Канцеларії публічного охранцю прав (омбудсман), Міністерству загранічных справ Словацькой републікы і Міністерству културы Словацькой републікы.

Депутатка словацького парламенту Еріка Юрінова, котра предсідать парламентному выбору про людьскы права і народностны меншыны, зареаґовала на писмо Мілана Піліпа і 8-го септембра подала в Народній раді Словацькой републікы інтерпелацію на міністра културы Марека Мадяріча, під котрого резорт Словацькый народный музей належыть, і котрого є міністерство зряджовательом.

„Ґенералный директор Словацького народного музею Віктор Ясань ся од заключінь конференції діштанцовав, но взглядом на порушіня словацькой леґіслатівы і діяня в незгоді з меншыновов політіков на Словакії є безодкладне, жебы была встановлена повна одповідность за выникнуту сітуацію. Директор державной інштітуції, котрого задачов є робити в меджах закона, і котрый ся од документу, в котрім выражать погляд в протиречіню і незгоді з нашов леґіслатівов, не діштанцує, не мав бы на своїм місці далше быти,“ написала втогды Юрінова.

Жрідло фотоґрафії: vypadni.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА