Солідарны з Підляшом

На Підляшы як на Лемковині – там тіж нищат двоязычны таблиці з назвами місцевости. Як поінформувал сайт Радия Білосток, незнаны справці замалювали дві польско-білорускы таблиці в ґміні Орля. 

До прикрого інциденту дішло уж в пятницю, 30. червця/юнія т.р., але жытелі проблем зголосили аж вчера, значыт в понедільок, 3. липця/юлия. Знищены сут двоязычне дорогове означыня на пути Орля – Дубічы Церковны та таблиця при въізді до села Редуты. Справці замалювали білоруску част таблиці фарбом.

На жаль, подібні як в примірі Лемковины, такы інциденты на Підляшы мали місце уж перше. В ґміні Орля в 2012 році было знищеных парунадцет двоязычных таблиц. Ґміна тота ввела 11. січня/януара 2011 рока 25 білорускых назв для сел і колоній, а дальшы дві пару місяци пізнійше – 17. листопада/новембра (для прим. першу лемківску назву введено в 2008 р. для села Білянка стараньом Стоваришыня Лемківской Молодежы «Чуга»). На Лемковині, щестьом в нещестю, по знищыню таблиц м.ін. в Ріпках, Реґєтові і Ґладышові, більше хуліґаньскых (а може цільовых антилемківскых) атаків не было. Надійме ся, же так остане.

фот. сайт Радия Білосток