„Смакы Галичыны”

Медженародний Центр Культуры в Кракові хоче сотворити віртуальну кухарску книжку Галичыны – Смакы Галичыны.

Кухня становит істотний елемент спадковины, а знаня о кулінарных звыках характеристычных для конкретных теренів, ци періодів істориі, може помочы в розумліню деякых соспільных або культуровых явиск. В остатніх роках збільшыло ся заінтересуваня кулінариями, а чым барже еґзотычна обшыр, тым ліпше притягнути туристів, зато неє ся што чудувати, же што раз частійше в корчмах полудньовой Польщы можеме найти стравы хоц-бы з обшыри называной “лемківском кухньом”. Чудувати може лем фантазия кухарів з декотрых місц. Бо ци фактычні Лемкы з діда прадіда заідали ся перогами зо шпинаком?

Кєд знате о даякых традицийных лемківскых переписах і хочете ся нима поділити, можете остати спілавторами Смаків Галичыны. Найефектовнійшым знавцям будут признаны нагороды.
Акция віртуальной кухарской книжкы Смакы Галичыны ведена єст попри выставі Міт Галичыны, орґанізуваній Медженародовым Центром Культуры в Кракові. То експозиция посвячена історычній спадковині вельонародовой Галичыны і пробі зміряня ся з єй мітом з перспектывы трьох держав – Австриі, Польщы і Украіны. Більше про выставу чытайте за мотузком.

Выставу мож обзерати до 8. марця 2015 рока в ґалериі Медженародового Центру Культуры в Кракові (Головний Рынок 25)