Служба Божа при капличці на граници Святковы і Розстайного

Подібні як в попередніх роках, і тепер, в суботу 11. червця/юнія од 10.00 год. буде одправлена Божеска Літургія при капличці на граници сел Святкова Велика – Розстайне. Шторічны богослужыня в тым місци сут правлены як памят свв. мучеників о. Павла Швайкo і його жены Йоанны.

О. Павел Швайкo в 40. роках ХХ ст. служыл на Лемковині як православний парох, перше в Дошници, пак в Святковій Великій. Одтамале зо свойом імостю был делеґуваний на Холмщыну, де в 1943 році понесли мученичу смерт. Рішыньом Святого Собору ПАПЦ были в 2003 році канонізуваны і причыслены до Лику Святых Мучеників Землі Холмской і Підляшской (памят тых святых была, як раз, споминана во вчерашню неділю).

Служба Божа буде правлена при муруваній каплици з 1928 рока, котра находит ся днес на териториі Маґурского Нацийонального Парку. Пут, при котрым стоіт, іде з Крампной на Бардиів. Днес капличка положена єст посеред лісів, на граници села Святкова Велика і неістнуючого уж русиньского села Розстайне.

Давне село Розстайне то днес порожній простір. Окрем капличкы, котра приналежыт до православной парохіі в Бортным і єст хоснувана наново од 2004 рока, меньше більше по середині села находит ся старий грекокатолицкій цмонтір, на котрым заховало ся пару памятників. Під конец Великой Войны в 1918 році згоріла церков свв. Космы і Даміана. В 1945 році більшіст жытелів пішла до Росиі, а 11 родин, котры остали, в 1947 році выгнано в рамках Акциі «Вісла».

Розстайне сусідує од полудньовой стороны з Вышоватком і Грабом, од заходу з Незнайовом, а од пілночы зо Святковом Великом та Святковом Малом. Через східню част села веде лісом пут до Жыдівского. Днес істнуют лем обі Святковы: Велика і Мала, в котрых заховали ся деревяны храмы, хоснуваны тепер як римокатолицкы костелы.