«Слово» – Закхейова неділя – неділя, 9.00 год.

Ісус Хрістос приходить до Єрихону. Ідуть з Ним і ученикы і много народа. При вході выздравлять сліпого чоловіка. В Єрихоні жыв єден богатый чоловік – Закхей, головнный мытарь.

І до нього дішов слух о Ісусови. Головно може, коли выздравив сліпого. Закхей захотів видіти Ісуса, хто він є. Но быв малого росту, так не міг його увидіти. Так задумав выйти горі на фіґовый стром на місці, де мав Ісус переходити. Там схованый за листьом хотів його увидіти.

Но Ісус знав о Закхейови, він увидів маленьку іскру в його сердці а запалив великый огень. Коли пришов на то місце, посмотрив горі а повів: Подь долов, днесь мам быти в твоїм домі. Закхей, котрый лем хотів увидіти Ісуса, на дашто таке не міг ани подумати, жебы Ісус захотів зайти до його обыстя. Скоро сходить а прияв го з радостьов.

Но видиме другый образ. Тоты, што ішли з Ісусом, нарікають: до грішного чоловіка зашов. Многы собі говорять: теперь сьме го розкрыли, же тото не є Богом посланый Спаситель. Тадь бы знав, хто є Закхей. Він предці великый богач, грішник, многых скривдив.

Але Ісус є тихо. Давать рости тому тріюмфу зла, жебы выросло до высоты. Неприятелі Хріста торжествують. Но Закхей нараз зачав бісіду о зміні, котра настала в його сердці. Господи, половину маєтку дам бідным, а пошкодженых мойов несправедливостьов одшкодню штирираз веце. Вшыткы противникы Ісуса стихли, были заганьблены. Знова ся указало, же Ісус мав правду. А тогды Ісус ся озвав: Днесь пришло спасіня до того дому.

Закхей увидів Ісуса, при погляді на нього увидів як кебы в дзеркадлі стан свойой душы. При погляді на чістого Хріста увидів брудоту у свойім сердці. А знав, же мусить то змінити. Ісус його не обвинює. Ісус быв тихо. Закхей при стріші з Хрістом обвинює самого себе. І давать постановліня змінити свій жывот. А Ісус приймать тото рішіня: Днесь пришло спасіня до того дому.

Ісус так позывать і нас. Приймийме тото позваня. Не смотьме на іншых, жебы ся порівнавати з гіршыма од нас. Але смотьме на Хріста. Тогды увидиме самых себе, стан свойой душы а так можеме прияти Боже одпущіня словами: Днесь пришло спасіня до той душі, до того обыстя. Слава Ісусу Хрісту!

В неділю, 6. фебруара 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 6. фебруара о 12.00 год. і 7. фебруара о 2.00 год. за русиньскым часом.