«Слово» – Воздвиженіє Честного Жывотворящого Креста – неділя, 9.00 год.

Днешню неділю празнуєме радостный праздник Воздвиженія Честного Креста. Чом є тот праздник радостный? Припоминать нам подію воздвигнутя Святого Креста святым Макаріом – патріархом єрусалимскым в 335-ім році.

Было то в часі, коли св. Єлена, мати святого Константина Великого пришла до Святой Землі і обновляла святы місця нашого спасіня. Втогды нашла Крест Господна, котрым святый Макарій вєдно з далшыма єпіскопами благословили вшыткы світовы стороны.

Тым указав світу, же Крест Хріста, котрый быв довгы рокы в землі а приношали там скверны жертвы ідолу нечістоты, теперь зажарив світу. А Свята Церьков празднує тоту подію каждго року, жебы нам припоминати, же ай кедь ся неприятелі Хріста намагають высміяти, зневажити пронаслідовати за Крест Хріста, посліднє слово буде належати Хрістови.

Він сам говорить: Втогды, при другім приході, появить ся знак Сына чоловіка- Святый Крест у великій славі. В Старім Завіті, коли выбраный народ путовав по пустыні а зачав нарікати на Мойсея, а тым і на Бога, Він допустив гадам, жебы їх грызли, а они громадно умерали. Втогды просять Мойсея, жебы ся за них молив. Бог наказав зробити мідяного гада і поставити на паліцю. Каждый, хто буде погрызеный і посмотрить з віров, буде жыти.

З яков віров мали смотрити? З віров, як учіть св. Ґриґорій Назіаньскый, же тот гад є мертвый. Так і мы, коли видиме зло коло себе і посмотриме на Святый. Крест, котрый буде цілый тыждень выставленый, смотьме і мы з поглядом віры і надії, же зло, гріх, діавол – тото вшытко є переможене Хрістом, а не падайме до малодушности.

А і кедь на даякый час ся може видіти, же зло мать якбы побіду, коли сьме на стороні Хріста, сьме на стороні вічного Побідителя. Слава Ісусу Хрісту!

В неділю, 27. септембра 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 27. септембра о 12.00 год. і 28. септембра о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА