«Слово» – Воздвиженіє Честного Креста – неділя, 9.00 год.

Праздник Воздвиженія Честного Креста, котрый теперь празднуєме, не є праздником смутку, терпіня, роздумов над крестнов смертьов Хріста. Але є то праздник радости, побіды.

Свята Церьков нам указує Святый Крест як знак побіды. Ісус Хрістос, коли говорить о своїм другім приході, говорить наперед ся укаже знак Сына чоловіка. Што є тот знак? То є Святый Крест.

Тото свято нам припоминать історічну подію, коли по довгых роках переслідованя была за святого Константина Великого дарована слобода хрістіанам. А мати свята Єлена путує до Єрусалима, де давать выбудовати храмы на вызначных місцях споєных з діалностьов Спасителя. При тій принагоді на Ґолґофті находить і Святый Крест, коли дала розваляти храм богыні (демона) Артеміды, збудованый на місці, де Ісус приніс свій жывот за спасіня людей. За імператора Адріана там збудованый храм Артеміды, де приношали поганьскы орґії, як жертву демону нечістоты. Тырвало то понад двасто років. Але коли нашов ся Святый Крест, патріарха Макарій його высоко піднимать і благословить на штири світовы стороны, указуючі, же по часі переслідованя, по тім куртім тріумфованю діавола, Господь указав силу Святого Креста.

Є то і потіха про нас, коли видиме як владарі того світа указують або сі думають, же они суть необмедженыма панами, же можуть рішати о жывотах другых. Же они можуть або через обіцянкы выгод, поставліня, богатства, славы або через грозбы, высмівання, понижованя ці переслідованя аж смерть стягнути на свою сторону зла.

Но праздник Воздвиженія указує, же лем до часу. Послідне слово буде належати Хрістови як Вічному Царьови неба і землі, а тыж справедливому Судцьови нашых слов, діл і думок. Коли тодгы приходиме в тім часі і оддавме нашым поцілунком честь Святому Кресту, памятайме на тоту побіду, а просьме, жебы сьме зістали вірны Хрістови, жебы побіда Креста была і нашов побідов. Слава Ісусу Хрісту!

В неділю, 2. октобра 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 2. октобра 2022 р. о 12.00 год. і 3. октобра 2022 р. о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА