«Слово» – Усікновеніє головы Йоана Крестителя – неділя, 9.00 год.

Йоан Креститель, коли зачав проповідати коло Йордана, приходило ку ньому множество народа. Но не каждый приходив із добрым наміріньом.

Йоан твердо напомминав тых, котры пришли з фалшивостьов і не хотіли змінити свій жывот. Но Йоан ся не бояв выступити і проти самого царя Ірода, коли видів, же робить несправодливо. Ірод одогнав од себе свою жену а взяв собі Іродіаду, жену свойого брата філіпа. Йоан твердо його напоминав. Ірод на нагваряня Іродіады дав заперти Йоана до вязніці. Ірод часто ку ньому сходив і його слухав. Но сила роскошы была в нім силніша. Як одходив од Йоана, забывав на науку, котру чуб од Йоана. Аж пришов день Іродовых народенин а з ним і велика гостина. Там танцьовала дівка Іродіады і полюбила ся Іродовы. То аж так, же опоєнй страстьов обіцяв під присягов дати і половину царьства. Она на нагваряня матери сі просила голову Йоана Крестителя. Ірод робив, же ся засмутив перед гостями, але посылать ката выповнити приказ.

Так з людьского погляду закінчів ся жывот того великого пророка. В понижіню од людей, як злочінця у вязніці. Но смерть Йоана была славна. Остав вірный Господу Богу, тепрь ся радує у славі. А посмотьме і на конець Ірода. Не довго ся радовав Ірод і Іродіада, же уж нихто не буде їм вытыкати їх грішный жывот. За курто на то быв позбавленый царьства імператором а посланый із цілов родинов до выгнанства де, бідно закінчів ся їх земный жывот.

Так ся наповнюють слова Божого слова: Одплатов за гріх є смерть. Роскош із гріха і страсти тырвать лем курто а приношать смерть тілу, але што страшніше, безсмертній душі. А хто вірно служыть Господу, хоць бы його смерть на тім світі была потупнов і понижуючов од людей, предці тота смерть буде славна, бо є переходом ку радостному і блаженому жывоту. Як была і у Йоана Крестителя Слава Ісусу Хрісту!