«Слово» – Свята великомучениця Варвара – неділя, 9.00 год.

Свята великомучениця Варвара была дівков вызначного богатого чоловіка, котрый быв завзятым ідолослужытельом. Його стараньом было, жебы сохранити свою дівочку перед поглядом того світа, але самоперше перед хрістіаньсков віров, котру ненавидів.

Дав у вежі зробити комнаты, опарадити, умістнив там ідолів, приставив служніці а там запер свою дівочку. Но она, коли засмотрила ся на світ, зрозуміла, же тото вшытко не повстало од себе, ани то не могли зробити ідолы, котрым оддавав честь отець. Порозуміла, же є лем єден Творця вшыткого, котрого в сердці любила, ай кедь го іщі не познала, але прягла по познаню.

Коли зачала підростати, отець єй хотів оддати за богатого чоловіка, она не хотіла ани чути, так єй доволює сходити з вежі, і сходити ся з людми. Но меджі нима были і хрістіаньскы дівчата. Так першый раз зачула імя Ісус Хрістос.

В їй сердці ся розгоріла велика любов ку Ньому і хотіла глубше Його познати. Тогды Божым ряджіньом єден пресвитер переходив, поучів єй глубше і покрестив. Яка была радость в сердці Варвары, коли виділа, як робітникы на приказ отця будують купелі, і зробили до стіны дві облакы, дала приказ, зробити три на честь Тройці. Коли ся вернув їй отець, она з радостьов йому повіла, же є хрістіанка. Він єй дав мучіти, а наконець была одсуджена на смерть. Сам отець ставать выконовательом розсудку. І властныма руками одтяв голову властной дівочкы.

Свята Варвара указує нам, хто мать отворене сердце, з позорованя світа коло себе, може познати свойого Сотворителя, і каждый зростати ку векшій любви ку Ньому. Як то робила і свята Варвара. Слава Ісусу Хрісту!

В неділю, 17. децембра 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 17. децембра 2023 р. о 12.00 год. і 18. децембра 2023 р. о 2.00 год. за русиньскым часом.