«Слово» – Сошетствіє Святого Духа – неділя, 9.00 год.

Ісус Хрістос, кідь бісідовав із своїма учениками, часто їм говорив о приході Святого Духа. Они многому не розуміли, хоць Ісус Хрістос много раз бісідовав єдно і тото саме. Ісус то сам стверджує, кідь говороить: Як прийде Святый Дух, припомяне вам вшытко, што я вам говорив. І як возношав ся до неба, повів їм: зістаньте в Єрусалимі до часу, коли будете підкріплены силов із неба.

Ученикы десять днів перебывають єдинодушно в Єрусалимі на молитвах вєдно із Пресвятов Богородіцьов, сторгнув ся великый гук, як бы зорвала ся велика туча. Народ, котрый перебывав в Єрусалимі, посходив ся там, што то діє ся. А над ученикы ся появили языкы якбы із огня, і розділили ся над каждого із них. Чом такым способом сходить Святый Дух? Огень спалює, зогрівать і просвіщать. Тым была назначена і діялность Святого Духа. Очіщовати, зогрівати і просвіщати наперед самых апостолів і потім тых, ку котрым будуть высланы. Сходить в подобі языків і ученикы зачінають бісідовати різныма языками, і вшыткы їх розуміють. Люди чудують ся, бо были там із різных народів і каждый їх розумів у своїй бісіді. Наповнило ся чудо правдивой єдности. При будованю Вавілоньской вежи, коли люди хотіли вытворяти єдность без Бога, наслідком было розділіня. Перестали собі розуміти і поросходили ся по цілій землі. Теперь, коли сходить Святый Дух, люди із різных народів розумлять апостолів, выникать правдива єдность. Із різных народів повставать новый народ, народ Нового завіта. Уж не етніціта, але Святый Дух є ґарантом той єдности.

Но приход Святого Духа не быв лем раз, а не лем про апостолів. Тото є адресоване і нам. Тадь і мы сьме были наповнены Святым Духом при міропомазаню. Но Святый Дух не бере нам слободной волі. Коли мы одвертаме ся од Бога і обертаме ся ку гріху, втогды одходить од нас, а як робиме щіре покаяня, знову приходить і нас наповнять.

Просьме прото і мы, жебы Св. Дух перебывав із нами каждого дня. Жебы нас очіщав, зогрівав, запальовав нашы сердця штораз векшов любвов ку Богу і просвіщав їх. Жебы сьме были правдивыма і жывыма свідками воскресшого Хріста в тім світі, котрый все веце одходить од Бога, і занурює ся до гріха, до неморалности. Жебы небоячо ісповідали свою віру не лем словом, але головно нашым жывотом. Слава Ісусу Хрісту!

В неділю, 27. мая 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 27. мая о 15.00, 20.00 год. і 28. мая о 2.00, год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: Сімбол Святого Духа в Базиліці святого Петра.