«Слово» – Сошествіє Святого Духа – неділя, 9.00 год.

Дорогы раіослухачі! Ісус Хрістос перед своїм вознесіньом на небо дав апостолам обіцянку приходу Святого Духа Потішателя, котрый їм припомяне вшытко, што Ісус учів. Тыж їм дасть силу свідчіти перед владыками того світа.

Апостолы десять днів сходили ся на молитвах очековали приход Святого Духа. На десятый день по вознесіню а пятьдесятый день по воскресіню приходить Святый Дух на апостолів в подобі огняных языків.

Приходить в подобі языків, жебы так, як в Старім завіті через будованя вавілоньской вежи, пришло ку розділіню языків. Народ хотів поставити вежу аж до неба і збудовати собі імя. Себе поставили до центра. Не на Божу славу, але на нашу. А так Бог зышов і помішав языкы і они перестали розуміти себе взаємно і перестали будовати вежу. Теперь сходить Святый Дух в подобі языків якбы із огня і вшыткых кличе ку єдности. Апостолы сміло проповідують а вшыткы їх розумлять. То святый вытворив теперь тоту єдность, хоць там были Жыды із різных країв.

А в подобі огня, жебы їх запалив тым божественным огньом і они ішли і сміло проповідали і позывали ку покаяню і крещіню вшыткы народы.

І мы просьме Святого Духа, жебы і нас наповнив, жебы сьме мали смілость свідчіти о воскресшім Спасительови і не бояли ся владыків того світа, ці тых, котры понижують, высмівають, зневажають нашу віру і самого Господа.

Най Святый Дух і в нас вытворять правдиву єдность, наперед в нашім сердці, в нашых родинах і в нашых державах. Жебы не будовати тоту вавілоньску вежу, котра ся роспаде, але тоту божу ставбу, з божым благословліньом, котра ся не розпаде. Бо є будована через Святого Духа. Слава Ісусу Хрісту!

В неділю, 7. юна 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 7. юна о 12.00 год. і 8. юна о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА