«Слово» – Рождество Ісуса Хріста – неділя, 9.00 год.

Настав час праздника Рождества Ісуса Хріста. Не є то лем припомянутя того, што одбыло ся, але є то жыве пережываня події нашого спасіня.

Коли Господь наш пришов на тот світ як маленька дітина, ангелы оголошають цілому світу: Звістую вам велику радость, днесь ся вам народив Спаситель у місті Віфлеємі. Но тота новина не была оголошена в царьскім палаці, але была оголошена бідным пастырям, котры в ночі дозерали своє стадо. Они прияли тоту новину, ішли до Віфлеєме і поклонили ся дітині.

В поганьскій землі появлять ся надзвычайна звізда, троє мудерці через ню спознавають, же ся народив Ізраільскый царь. Выдавають ся на путь, приходять до Єрусалима, бо сі думають, де інде ся мать народити царь, як не в царьскім палаці. Но ту находять Ірода, котрый перестрашено ся звідує знателів Писма і учітелів закона: Де ся мать народити Хрістос? А діставать одповідь: У Віфлеємі.

Мудерці приймають нову інформацію, же святы книгы ізраільского народа говорять о народжіню у Віфлеємі. Ідуть до Віфлеєма, складають йому свої дары: золото, кадило і міро. Оддавють йому честь і задумують вернути ся назад. Но ангел їх напоминать, не вертайте ся назад ку Іродови. По іншій дорозі ідьте до свойой землі. А они так зробили. Хоць утікали, як злочінці, предці в сердці мали радость, бо зо собов несли новонародженого, котрый ся уж народив в їх сердцях.

Так видиме, же Рождество Ісуса Хріста выжадує од нас одповідь, рішіня: Пастырі і мудерці прияли тото позваня. Ірод і знателі Писма, хоць были так близко, не прияли а задумовали о смерти дітины. І на нас є тото рішіня, кого будеме в нашім жывоті наподобовати – пастырів і мудерців, або Ірода і знателів Писма.

Дайме мы одповідь як мудерці – по іншій дорозі ся вернули до свойой землі. І мы зачнийме жыти іншым жывотом: жывотом в любви ку Богу і ближньому, жывотом в милосердю ку потребуючім, жывотом в покою, котрый нам приношать Віфлеємска Дітинка. Хрістос раждається!

В неділю, 9. януара 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 9. януара о 12.00 год. і 10. януара о 2.00 год. за русиньскым часом.