«Слово» – Рождество Ісуса Хріста – неділя, 9.00 год.

Дорогы радіослухачі! Із Божой благодати святкуєме радостный праздник Рождества. Євангеліє од Мафтея, котре ся чітать на днешній день, нам не дає даякых конкретных інформацій, лем конштатує : За панованя царя Ірода, кідь у Віфлеємі юдейскім народив ся Ісус, пришли троє маґів із Выходу, проваджены звіздов, глядаючі новонародженого Царя Ізраіля.

Што рушало тых людей, котры ся кланяли ці служыли звіздам як богам, жебы ся взяли на дорогу до незнамой країны глядати царя Ізраїля? Была то звізда. Они добрі знали о пророцтві їх прапредка Валаама, о выході звізды од Якова. Кідь увиділи тоту нездвычайну звізду, порозуміли, же теперь пришов тот час. І приходаять до Єрусалима, глядають го в царьскім палаці. Но Ірод є зачудованый, і розрушеный дає собі закликати знателів Писем, де ся мать народити Хрістос, Месія, Помазаный. Они йому одповідають – у Віфлеємі, бо так написав пророк Міхей. Ірод дав собі тайно закликати мудерців – маґів і высылать їх глядати дітину і дати йому знати, бо уж задумав штось недобре у своїм сердцю. Мудерці выслухали царя і пустили ся на дорогу. Звізда ся їм знову появила і запровадила їх на місце де была дітина. Они ся му поклонили і одкрыли свої мішкы із цінностями: золото, кадило і міро. Як Царьови, Богу і мертвецу. На дорозі назад уж не звізда їх провадить, но ангел у сні їх напоминать не вертати ся назад. Но іншов дорогов вернути ся до свойой країны, што они і зробили.

Тото посолство є адресоване каждому. Бог приходить на тот світ, приходить до зимы людьского гріха, жебы зогріти свойой любвов. Приходить міджі бессловесных (бессловесный – хто не має слова і хто не має розум – звірятко). Ісус пириходить як дітина – бессловесный, міджі бессловесных – звірят, жебы чоловіка, котрый став ся бессловесным, знову поздвигнути до первістного достоїнства. Бог ставать ся чоловіком, жебы чоловіка зробити Богом.

І так праздник Рождества не є лем історічнов подійов, але жывов реалностьов. А зато владыка того світа – діявол і його рабы, ненавидять і самый праздник Рождества. В многых країнах є заказано што лем спомянути слово Рождество. Інде зясь співати колядкы ці вказовати сімболіку Рождества. Но ту не іде лем про тото, жебы нам хтось не сперав святковати Рождество. Але жебы тот праздник быв і в нашім внутрі. Жебы сьме доволили Богу мінити наше сердце, як ся то стало із тыма мудерцями, жебы не вертати ся назад до рабства гріха і смерти. Лем так будуть про нас тоты святкы радостны, благословлены. І тото хочу зажелати вам вшыткым: правдиво радостны, благословлены, щастливы Рождествены свята. Хрістос раждаєт ся!

В неділю, 7. януара 2018 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 7. януара о 15.00, 20.00 год. і 8. януара o 2.00 год. за русиньскым часом.

Фото: Поклон пастырів. Жрідло: Wikipedia.