«Слово» – Преподобный Антоній Великый – неділя, 9.00 год.

Свята Церьков нам каждый день указує приклад даякого святого. Того тыждня преподобного Антонія Великого. Хто быв тот святый і якый хосен з познаня його жывота?

Народив ся коло року 250 в Еґіпті. Мав побожных і богатых родічів, котрых Господь скоро покликав до вічности а він зістав сам з молодшов сестров, о котру ся старав. Він любив слухати Боже слово, приходив до церькви з великов радостьов. Раз чув о жывоті першых хрістіанів і прягнув їх наслідовати.

Іншый раз чув слова: Ідь продай што маш… І зрозумив, же то йому суть адресованы тоты слова. Так він звірив свою сестру побожным дівам а сам одходить недалеко од дому, де жыв єден старець. У нього перебыв даякый час а потім ся выбрав глубше до пустыні, де постом і молитвов іщі веце зростать у святости.

Тогды діавол, видячі його духовный поступ, указує на богатство, котре зохабив, што вшытко міг мати у світі. Тыж думками на молодшу сестру не покоїв його душу. Антоній прязнов молитвов перемагать тото спокушіня. Так діавол хотів выхосновати його молодость на розбуджіня тілесности. Указовав ся в подобі нагых жен. Антоній думками на страшный суд перемагать і тото спокушіня. Діавол, хотячі звести го до пыхы, указує ся в подобі маленького чорного хлопця, котрый барз плакав. Антоній, думаючі не на свої заслугы, але на поміч Божу, покоров заганять і тото спокушіня.

Тогды уж діавол зачав явно його страшыти дикыма звірями і нападаньом на нього. По єдній такій атаці Антоній увидів Господа і говорить йому: Де єсь быв? А Ісус одповів: Ту єм быв з тобов. А одтеперь буду тобі все помагати і давам тобі владу над нечістыма духами.

Так Антоній перемогші тоты спокушіня став ся передводительом множества монахів. І мав понад сто років, кедь одышов до вічности.

Так давать хосен і нам. Коли робиме Боже діло а выжадує то нашу жертву, діавол не покоїть – нашто таке марнованя і так то не звладнеш. Выхоснуйме средство Антонія – піст і молитву. Коли діавол не покоїть нечістыма думками, роскошами, привязаностьов ку тілесному і земному – одповіджме средством Антонія – думков на страшный суд і на слова: Ідьте од мене прокляты до вічного огня.

А кедь зазнаваме і вонкашні атакы а думаме собі, же і Господь нас зохабив- тогды подумайме на слова Господа Антонійови: Я єм з тобов! Слава Ісусу Хрісту!

В неділю, 4. фебруара 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 4. фебруара 2024 р. о 12.00 год. і 5. фебруара 2024 р. о 2.00 год. за русиньскым часом.