«Слово» – Праздник Вознесенія – неділя, 9.00 год.

Ісус Хрістос по своїм воскресіню із мертвых штиридцять днів перебывав зо своїма учениками. Учів їх о небеснім царьстві, зорбив перед нима много чудесных діл, котрыма доказовав, же жыє.

Тото перебываня уж было іншым, як перед страстями. Його тіло было прославлене, приходить через заперты двері, указує ся в різных подобах. Іншы його уж не видять, лем його ученикы.

По штиридцятьох днях взяв своїх учеників на Оливну гору, наказав їм проповідати Євангеліє вшыткому сотворіню, крестити їх, научати сохраняти Хрістову науку, і дав обіцянку, же буде перебывати з нима до кінця світа. Благословив їх і возніс ся до неба. Ученикы смотрили за Ним до неба. Ангелы їм говорять: што стоїте а смотрите до неба. Тот самый Ісус прийде знову так, як вы його виділи одходити до неба.

Так праздник Вознесенія і нас учіть: Господь возніс ся до неба, выздвигнув павшу людьску природу а спосадив вєдно коло Отця. Учіть нас піднимати свій погляд горі – не дати ся старостями жывота, проблемами, траплінями, ці пронаслідованьом, понижованьом, высміваньом про Його імя падати до малодушности. Не дати ся баламутити страстями, роскошами гріхом, знаючі, же курто тото вшытко тырвать, а посліднє слово буде належати Богу. Жебы не бояти ся владыків того світа, коли указують свою міць і силу. Бо Він прийде у славі зо вшыткыма ангелами і святыма судити каждого подля його діл. Указує, же наше обыстя є в небі, де маме прямовати.

Тыж словами ангелів: што стоїте і смотрите – кличе од линивства ку діялности на Божу славу, выхосновати каждый день творячі добро. Апостолам – ідьте голосьте Євангеліє каждому сотворіню. Нам говорить – там, де ся находиме, выдавайме свідчіня о нашій вірі не лем нашыма словами, але і нашыма ділами.

Жебы, як прийде Господь у славі, сьме і мы учули – подьте благословлены а будьте наслідниками мойого Царьства на вікы. Слава Ісусу Хрісту!

В неділю, 5. юна 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 5. юна о 12.00 год. і 6. юна о 2.00 год. за русиньскым часом.