«Слово» – Праздник Воскресіня – Пасха – неділя, 9.00 год

Празднуєме світлый праздник Воскресенія Господа нашого Ісуса Хріста. Тот праздник в нашых літурґічных книгах характерізують слова: світло і радость. По днях темноты, коли ся виділо, же зло мать посліднє слово.

Кедь тоты, што ненавиділи Хріста, робили вшытко, жебы Його поїмати і убити, но бояли ся народа. І так їм пришло пригодным, кедь єден із учеників – Юда Іскаріотьскый, сам ся зголосив, же їм го выдасть до рук. Они му назначіли 30 стріберняків. За тоты Юда і запродав Спасителя, в Ґетсіманьскій загороді быв поїманый, приведеный перед архієреїв, котры го одсудили на смерть і передали владі Пілата. Тот їм дав можливость выбрати меджі Варавом і Ісусом. Они выбрали Вараву і про Ісуса просили крест. Пілат їм зробив по волі. Дав прибити Ісуса на крест на велику радость архієреїв, книгознателів Писма, котры ани під крестом му не дали спокій, но і там ся посмівають. А Ісус указує свою любов. Просить Отця, жебы їм тото одпустив. Кедь умер і дали Го до гробу, вшытко стихло, неприятелі Хріста ся радовали. Темнота царьствовала, но не довго. Ісус зыйшов душов до гробу, но його божество ся не одлучіло ани од душі, ани од тіла. Знищів владу смерти а воскрес із мертвых. Ангел при гробі звістовав: Чом глядате жывого меджі мертвыма? Не є ту, воскрес! Сам Господь ся появлять женам: Радуйте ся!

Будьме і мы у своїм сердці наповнены тым світлом і радостьов. Світлом воскресіня і радостьов із того, же смерть уж перестала быти смертьов. Же гріх є одпущеный. Небо про нас стало одкрытым. Смерть стала початком нового жывота. Гріх быв зниченый. Вєдно із Хрістом сьме были занурены і похованы в його смерти, жебы сьме умерли гріху, а жыли Богу. Но так, як выбраный народ, і мы можеме знову ожывляти старого чловіка, знова ся обертати і вертати до Еґіпта гріху. Прото слухайме слова першой пісні канона. Воскресенія день, просвітим ся людиє.. Майме в собі тото світло. Не затемнюйме своє сердце через гріх, через страсти. Але най буде наповнене світлом і радостьов а каждому тоту правду оголошайме: Хрістос воскрес!

В неділю,  28. апріля 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 28. апріля 15.00. і 29. апріля о 2.00, год. за русиньскым часом.

фото – Лукас Кранах старшый, Воскресеніє Ісуса Хріста, wikipedia