«Слово» – Праздник Воскресенія – Пасха – неділя, 9.00 год

По великім гуку і множестві народа , што быв в часі Хрістовых страстей, наступила тихота Великой суботы. Неприятелі Хріста собі ужывали свою побіду.

Ученикы у великім жалю і страху позапераны перед Жыдами. Але приходить недільне рано. Ку ученикам приходять жены, котры приношають радостну новину: Хрістос воскрес. Свідчать о появліню ангелів при порожнім гробі як і о аамім Господі, котрый по дорозі ся їм зъявив.

Тота новина вшытко мінить. Смерть є зничена. Небо отворене. Діавол, одвікый неприятель чоловіка, є переможеный. Хрістос нас перевів од смерти ку жывоту, од землі ку небу. Днесь ціла природа ся радує. Вшытко є наповнене світлом. Євангеліє голосить на веце языках: Бог Слово умер, але і воскрес! А мы од днесь по добу штиридцятьох днів тоту правду нашой віры звістуєме світу і своїм поздравом: Хрістос воскрес – воістину воскрес!

Хрістос тоту побіду даровав нам. Днешній празник не є лем історічным, але є актуалным і про мене, і про тебе. Тото слово Воскресіня є великов потіхов, коли видиме, же зло, якбы пановало у світі. Кедь з людьскго погляду видиме атакы на Церьков, на Евхарістію. Кедь не видиме выходу з той сітуації. Ту нам звучіть тото радостне Хрістос воскрес! Про каждого є отворена дорога ку вічному щастю, блажености.

Ісус говорить женам: Повіджте моїм братам і Петрови. Петро в часі терпіня одрік ся. А теперь як бы чув о воскресіню, што міг теперь чекати, яка кара його чекать? Але Ісус выпреджує Петра, через жены му говорить: Не бій ся, Петре, вшытко є одпущене. Не бій ся, належыш ку моїм апостолам.

З того і про нас є велика потіха. Так як Петрови, Ісус і нам говорить: Не бій ся, прийдь ку мі, Я ті дарую вічный жывот. Приймиме тото посолство радости до нашого жывота. Бо кедь зіставаме в рабстві гріха, коли в душі є темнота, якый хосен лем з того вонкашнього празднованя? Жычу вшыткым правдиво радостны світлы свята Воскресіня. Хрістос воскрес!

В неділю, 24. апріля 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 24. апріля о 12.00 год. і 25. апріля о 2.00 год. за русиньскым часом.