«Слово» – Праздник Воскресенія – Пасха – неділя, 9.00 год

Празднуєме радостный праздник Хрістового воскресенія. По днях смутку і терпіня наступує день побіды і радости.

Тот тыждень, котрый ся называть Великым тыждньом не зато, жебы были довгшы дні, але про великы події нашого спасіня. Сын Божый дав себе добровольно на мукы, на бичованя, оплюваня, терньом вінчаня, одсудджіня на смерть і похованя до гроба. Його неприятелі сі думали, же они мають побіду. Під крестом сміяли ся, крутили головами.

Але по Великій суботі, коли вшытко затихло, ученикы пережывали велику болесть, смуток, приходить недільне рано. Жены ідуть ку гробу, де ангел їм звістує: Чом глядате жывого меджі мертвыма. Не є ту, він воскрес. Звістуйте тоту новину його ученикам.

Ку ученикам приходить через заперты двері. Емаузькым ученикам при ламаню хліба. Смерть уж перестала мати владу. Бо од смерти ку жывоту, од землі ку небу нас перевів Хрістос. Воскресіня день. Будьме наповнены світлом. Не жыйме уж в темноті, але приймийме тот новый жывот, котрый нам Ісус даровав свойой побідов над гріхом, над смертьов, над діаволом.

Поздравканьом Хрістос воскрес – Воістину воскрес!, котрым будеме через 40 днів голосити тоту правду цілому світу, най буде звістованьом і нашого воксресіня з рабства злого, з гріха. Приношайме тоту новину тому світу, котрый зануреный до темноты невіры, гріха, темноты.

На вшытко, што ся діє коло нас смотьме новыма очами. Не страхом, неістотов з будучности, але з надіов і радостьов, бо сьме увірили Тому, котрый мать вшытко у своїх руках. Котрый є Владыка неба і землі. Котрому належыть послідне слово. Нам треба лем єдно, быти на його стороні а тогды його воскресіня буде інашым цоскресіньом. Хрістос воскрес!

В неділю, 2. мая 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 2. мая о 12.00 год. і 3. мая о 2.00 год. за русиньскым часом.