«Слово» – праздник Входа в храм Богородицы – неділя, 9.00 год.

Того тыждня сьме праздновали праздник Входа в храм Пресвятой Богородіці. О тім празднику як і о іншых Богородічных праздниках не находиме пряму інформацію в Божім слові.

Но непрямы одкликы можеме находити в псалмах. Подля традіції была Марія як трирічна приведена до Єрусалимского храму. Там єй прияв пророк Захарія, отець св. Йоана Крестителя. Він єй запровадив до Святая Святых. Там міг вступити лем сам архієрей, і то лем раз до рока, з кровльов, котру пожертвовав за себе і провину народа. Марія вольно могла вступовати там, де находив ся ківот завіта, бо она мала сама стати ся духовным ківотом, котрый прияв до себе не табліці завіта, але Божого Сына. Сам архангел Гавриїл приношав єй там небесный хліб, бо она мала дати світу Хліб, котрый зышов із неба. Она согласила ся з вольов Божов, розлучила ся з любыма родічами, жебы оддати ся на служіня Богу. Так само родіче одовздаваючі свою прелюбу дітинку на служіня Богу, дали ся цалком до божых рук. І боже провидіня постарало ся о них в їх уж похылім віку.

Тот праздник є тыж праздныком Богу присвяченых душ, котры одповідають на Боже покликаня і ідуть за ним, зохабляючі своїх родічів і близкых. А так тот праздник говорить ку душам, котры Бог кличе, жебы не бояли ся одповісти на тото покликаня. Жебы зробити тот акт віры, крок до незнама, принести тоту жертву самых себе. Тыж говорить і ку родічам, жебы не бояли ся одповісти на кликаня дітей, жебы доволили своїм дітям іти за вольов Божов, бо тым не стратять своїх дітей, але через тоту жертву набудуть боже благословліня, а будуть їм ближе через Бога, як кебы перебывали з нима. Най приклад Марії і єй родічів Йоакіма і Анны в тім помагають тото прияти. Слава Ісусу Хрісту!