«Слово» – Праздник Успенія Пресвятой Богородіці – неділя, 9.00 год.

Пережываме праздник Успенія Пресвятой Богородіці. Є другым великым праздником того місяця, або ліпше повісти його наповніньом. Ісус Хрістос на горі Тавор вказав частку славы свого божества, накілько были апостолы способны прияти.

Но вказав тыж і будучу славу обновленого чоловіка, при Його другім приході. А як раз на Марії ся уж наповнило то, што ся пак наповнить і на нас, кедь вытримаме у вірности Господу. Ісус Хрістос своїм приходом на тот світ зробив смерть уж лем часом куртого спаня. Зато кедь чуєме в Божім слові о воскресінях яіровой дівкы ці наімского хлопця або і Лазаря, Ісус там всядыль говорить: Лем спить, іду збудити. Но они вшыткы, хоць втогды воскресли, предці іщі раз мусили вмерти – заспати до часу славного воскресіня.

Но із Марійов было іншак. Кедь ся приближовав час єй переходу до вічности, Господь чудесным способом згромадив апостолів, порозходжаных по цілім світі, проповідаючіх євангеліє. Они мали быти свідками тілесной смерти Божой Матери. Яков радостнов была земна кончіна Марії. Євангеліє праздника нам говорить: Блажены, котры слово Боже слухають і сохраняють. Марія робила так цілый жывот. Приїмала Боже слово до сердця, сохраняла і апліковала в своїм жывоті. Зато односить ся на ню тото слово: Блажена. Як ся наповнив час їй земного жывота, з радостьов передала свою душу в рукы свого Сына, по котрім так прягла, жебы была зъєдинена із ним.

Апостол Тома, котрый не быв при їй смерти, нам зохабив доказ того, кедь пришов на третій день а хотів видіти їй тіло, но його в гробі не было. Так як нам дал доказ через дотуліня ся ран і кости Хріста о Воскресенію Господа, так нам дав доказ, же Ісус Хрістос на третій день воскресив свою Матірь і прославив небеснов славов із тілом і душов.

Зато празднуючі їй праздник Успенія просьме єй, жебы нам выпрошала добру і радостну кончіну нашого жывота. Слава Ісусу Хрісту!

В неділю, 1 септембра 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 1 септембра о 12.00 і 2 септембра о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА