«Слово» – Праздник Успенія Пресвятой Богородіці – неділя, 9.00 год.

По вознесіню Ісуса Хріста на небо, сердце Марії горіло тужбов по зъєдиненю зо своїм сыном. Але іщі не быв тот час.

Первісна Церьков потребовала Марію, єй материньскый покров. Про апостолів і першы хрістіаньскы общества наповнювала слова із креста: Смоть, твій сын – смоть, твоя мати.

Подля традіції, коли надышов тот очекованый час, архангел Гавриїл появив ся Пречістій Діві і звістовав, же уж за курто буде зо своїм Сыном і Богом. Яка радость наповнила сердце Марії, коли чула тоты радостны слова. Про них она жыла цілый час. Але перед свойов смертьов мала іщі желаня увидіти вшыткых апостолів, котры ся порозходили по цілім світі, оголошуючі Євангеліє.

Господь выповнив тото желаня свойой Матери. Они были чудесным способом згромаджены ку смертельному ліжку Марії. А сам Господь зо своїма анеглами і святыма сходить, жебы прияти душу свойой любой Матери.

Якый прекрасный момент, яка радость, яке блаженство наповнило Марію. Чом была єй смерть така радостна? Бо она цілый жывот наповньовала слова: Най буде Твоя воля. Жыла любвов ку Богу і ближньому, дотримуючі заповіді. Церьков называть єй одход до вічности успенієм – заснутьом. А так як Божый Сын на третій день, і она воскрешена і взята до небесной славы із тілом.

На ній першій наповнило ся, што сьме праздновали в опереднім празднику Преображенія. Там Ісус на горі Тавор указав частку свойой славы, но і славы, котра є про нас приготовлена при Його другім приході.

А што робити, жебы і наша смерть была така радостна? Наповньовати проґрам Марії: Най буде мі подля твойого слова. В каждім часі повинити Божу волю. Жыти в любви ку Богу і ближньому, дотримуючі вшытко, што Він нам наказав. Прото просьме нашу Небесну Матірь в день єй великого праздника Успенія, най нам ку тому выпрошат потрібны благодати. Слава Ісусу Хрісту!

В неділю, 28. авґуста 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 28. авґуста о 12.00 год. і 29. авґуста о 2.00 год. за русиньскым часом.