«Слово» – праздник св. Николая – неділя, 9.00 год.

На праздник св. Николая тішать ся великы і малы. Є знамый по цілім світі. Хто быв св. Николай і чім собі здобыв таку славу?

Св. Николай ся народив в родині вызначных і богатых родічів. По їх смерти св. Николай выхосновав їх богатство на діла милосердя. Но робив то так, жебы о тім нихто не знав. Старав ся уникати славі од людей. Сам задумовав вступити до монастыря і в тихости дожыти свій земный жывот. Но Бог мав про нього іншый план. Св. Николай, котрый все глядав Божу славу і його волю, підволив ся Божому рішіню. Быв выбраный на архієпіскопскый престол в місті Міры в Лікійскій области. В часі імператора Діоклетіана быв увязненый, а як была дана слобода хрістіанам, вертать ся із вязніці окрашеный вінцьом ісповідника. Бог го наділив творіньом многых чудесных діл. Брав участь і на Першім соборі в Нікеї, де сміло стояв на позіції правды проти єресы аріанізму, котра не признавала Божество Хріста. Св. Николай завершыв свій плодный жывот наповненый добрыма ділами, і по вічну нагороду одышов 343-го року. То, же є прослвляный по цілім світі, є про його велику доброту, котра выходила із його глубкого споїня з Господом Богом. Тота любов ку Богу ся проявляла і в його любви ку ближньому.

Многы в тім світі наподобнюють св. Николая в його доброті. На його день роздавають дарункы. Але забывають на тото фундаменталне, із чого тота доброта выходила. Зіставають лем на поверьху. Праздник св. Николая учіть, жебы робити добро, робити його в скрытости. А робити його із любви ку Богу і ближньому. Слава Ісусу Хрісту!

В неділю, 22 децембра 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 22. децембра о 12.00 і 23. децембра о 2.00 год. за русиньскым часом.

фото горі: wikimedia

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА