«Слово» – Праздник св. Николая Чудотворця – неділя, 9.00 год.

Імя святого Николая є знаме по цілім світі. Познають го малы і великы. Но тот світ нам представлять Николая як якогось діда в білочервенім облечіню, котрый розношать дарункы. Но хто быв справды святый Николай?

Святый Николай походив з Малой Азії, жыв у половині третього стороча. Вызначав ся великов любвов ку Богу і ближньому. Його стрыко Николай, видячі його велику любов ку Богу, высятив го на священика. Уж як священик старав ся выповняти слова Євангелія: най єдна рука не знать, што робить друга. Своє добры діла робив в таємности, скрыто перед людьми, но не были скрыты перед Богом.

Коли навщівив святы місця Палестины, там хотів дожыти свій жывот, но Господь йому повів: не ту є твоє місце, верний ся до свойого края. Так він вернув ся і вступив до монастыря, котрый основав його стрыко, і думав, може ту мам быти, но Господь і ту йому повів: кедь хочеш од мене вінець, ідь до світа.

Так він іде міста Міры, никым непознатый. Но Господь мать про нього план. Коли умер єпіскоп того міста і єпіскопи ся не знали злагодити, кого выбрати, еден із єпіскопів дістав познаня, тот буде, хто першый прийде до церькви і його імя Николай. Так святый Николай накілько мав звычай ходити скоро на молитву, вошов першый і став ся архієпіскопом. І надхнено взяв ся за діло спасіня людьскых душ.

Но в тім часі ся розгоріло переслідованя за імператора Діоколетіана. Святый Николай быв взятый до вязніці. Там перебыв много років. Хто выповість діятельность в його новій єпархії? Кілько хрістіанам быв потіхов в зношаню мук за Хріста, кілько розбійникам указав дорогу ку спасіню? Так вшытко, што діяло ся в його жывоті, принесло великый хосен.

По Міланьскім едікті святый Константін дав слободу, і святый Николай овінчаный вінцьом мученицьтва і ісповідницьтва вертать ся ку свойому духовному стаду, жебы аж до свойой смерти намагав ся за спасіня людьскых душ.

Господь його наділив даром творіня чудесных діл. Од того йому Свята Церьков дала тітул чудотворець. А то нелем за свого земного жывота, но іщі веце по переході по небесну нагороду.

Так приклад святый Николай учіть нас приймати вшытко, што діє ся в нашім жывоті, ай кедь тому в даній хвілі не розуміме. Але тым, котры Бога люблять, тото вшытко служыть на хосен. А тыж нас учіть не глядати славу у людей, не робити добры діла перед людми, жебы нас виділи. Но глядати славу у Бога, котрый видить в таємности а одплатить раз явно. Слава Ісусу Хрісту!

В неділю, 24. децембра 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 24. децембра 2023 р. о 12.00 год. і 25. децембра 2023 р. о 2.00 год. за русиньскым часом.