«Слово» – Праздник св. Николая Чудотворця – неділя, 9.00 год.

Імя святого Николая є знаме по цілім світі. На його праздник ся тішать молоды і страшы. Хто быв св. Николай, а чом є так облюбеный?

Св. Николай ся народив в місті Патара в половині 3-го стороча. Його родічі были заможны но і барз побожны. Св. Николай выростав в оточіню віры і любви ку Богу і ближньому. Як ся став священиком, одиходить до Св. Землі, де хоче пережыти і свій жывот на пустыні, но Божа воля была інша, посылать го до світа, жебы быв світлом про другых. Він вырішыв помагати другым так, жебы о тім нихто не знав. Утікаючі так од славы того світа за добры діла. Хотів лем єдно, повнити волю Божу і глядати Його славу. Божым ряджіньом быв выбраный на архієпіскопа міста Міры, кедь першый вошов до церькви, де проходив собор выбору нового святителя по смерти бывшого архієпіскопа. За пронаслідованя імператорів Діоклетіана і Максіміана быв запертый до вязніці, до перебыв немало часу. Кедь св. Констатін дав слободу хрістіанству, св. Николай ся вертать до свойой єпархії, жебы продовжати своє архієрейске служіня. Брав участь і на Нікейскім соборі, котрый быв скликаный проти єретіка Арія, котрый не вызнавав Божество Ісуса Хріста. Св. Николай запалисто поставив ся на сторону Церькви, і так ревно выступив проти Арія, же вдарив го там по твари. Отцям собору ся не злюбило таке поступованя і одобрали од Николая епіскопску достойность. Но кедь дакотры з них мали виджіня, як Пресвята Богородіця і сам Хрістос подавають му євангеліє і омофор, зрозуміли, же Николай в запалености за Бога і Його славу вдарив Арія як Божого противника. Николай потім вернув ся до міста Міры, де до кінця свойого жывота выконовав служіня архієпіскопа. Быв про вшыткых прикладом святости і добрых діл.

Тому і нас учіть св. Николай. Глядати наперед Божу славу, утікати о славы того світа. Любити своїх ближніх і робити добро, не про людьске око, але із любви ку ним. Св. Николай у своїм жывоті выповнив першу і найголовнішу заповідь: Будеш любити Господа Бога твойого цілым сердцьом, душу, думками, силов і свого ближнього як самого себе. Зато Бог його прославив уж ту на землі, а іщі веце в небеснім царьстві. Його імя стало знамым по цілій землі. Його память Церьков прославлять в децембрі, маї, а тыж каждый четверь. Най і нам своїма молитвами выпрошує выповньованя в нашім жывоті той заповіді. Слава Ісусу Хрісру!