«Слово» – Праздник св. Йоана Богослова – неділя, 9.00 год.

В днешній день празднуєме память святого апостола і євангелисты Йоана, котрый походив із Назарета. Вєдно зо своїм отцьом Зеведейом і братом Яковом были рыбарями.

Коли Ісус переходив коло Ґенесарістьского озера, покликав Петра і Андрія, а потім Йоана і Якова. Они, хоць вєдно зо своїм отцьом справляли сіті, зохабили вшытко а ішли за ним.

Ісус Йоана зараховав меджі дванадцятьох апостолів, а окреме і меджі тых, котры были свідками воскресіня Яіровой дівкы, Преображенія на горі Тавор, а тыж і в Ґетсіманскій загороді перед Хрістовыма страстями. Коли Ісус там быв поїманый, запроданый Юдов, Йоан наслідує Ісуса до левовой ямы – до двора архієрея. Не зохаблять Ісуса ани під крестом. А по воскресіню спознавать переслідованя зо стороны Жыдів, вєдно з далшыма є увязненый, но пущеный ангелом на словбоду і сміло проповідать.

По успенію Пресвятой Богородиці Йоан одходить проповідати Євангеліє до поганьскых країв, головно Ефезу. Там є оскарженый поганами перед імператором Домітіаном, котрый ся старав обіцянками і грозьбами одвести од Хріста. Дав шмарити го до котла з кыпячім олійом, но Йоан зістав неушкодженый. Одсуджує го на остров Патмос, де написав книгу Зявліня, по часі є ослободженый од выгнанства і проповідать на могых місцях, де чудесныма ділами потверджує Гоапосдь його проповідь.

Коли зостарів ся часто, повторяв лем єдно: діточкы, любте ся меджі собов. Тото є Господня заповідь. Хто тото выповнить, выповнив вшытко.

Йоан старав ся наповняти тоты слова своїм жывотом. За што і дістав вызначіня як ученик, котрого Ісус любив. Йоан і днесь нам говорить о потребі щірой взаємной любви меджі хрістіанами. Видиме, як ся розросла нелюбов, завистливость, стараня перехытрити облесныма словами про свої выгоды свойого ближнього, як выхолодла любов.

Святый нас вызывать, вернийтеся ку любви. Любте ся меджі собов. Робте добро, не робте собі зло. Просьме того великого апостола і євангелисту, най нам тоту любов выпрошать у Господа. Слава Ісусу Хрісту!

В неділю, 9. октобра 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 9. октобра 2022 р. о 12.00 год. і 10. октобра 2022 р. о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА