«Слово» – Праздник Сошествія Святого Духа – неділя, 9.00 год.

По празднику Пасхы і Вознесіня празднуєме днесь праздник Сошествія Святого Духа. Ісус Хрістос часто говорив апостолам о приході Святого Духа. І перед своїм Вознесіньом давать їм наказаня перебывати в місті, покы не приймуть Святого Духа.

Но не повів їм, коли то буде. Так апостолы каждый день перебывали на молитвах і очековали приход Святого Духа. Коли настав десятый день по Вознесіню а пятьдесятый день по Пасхі, зышов на апостолів Святый Дух. Про тых, што были вонка, было знаком гукот вітра якбы отд великой буркы. А про апостолів появліня огняных языків.

Чом праві такым способом сходить Святый Дух? На Ісуса зышов в подобі голуба над Йорданом при Його крещіню, а на апостолів під видом огняных языків. Жебы припомянути єдну подію в історії людьского роду.

Было то по потопі світа. Кедь вонкашні знакы той великой траґедії гріха были видимы. І люде якбы забываючі на тоту страшну подію – потопу світа, знова зачінують думати о собі высоко. Задумують збудовати вежу, котра буде аж до неба. І так як бы посмівали ся Богу, же уж ся потопы бояти не мусять, уж ім нич грозити не буде. Мали тогды єден язык, каждый выдавав тоты самы звукы. І каждый каждого розумив. І зачали будовати. І зышов Господь і помішав языкы тых, котрых согласность вела ку злу.

Теперь сходить Святый Дух в подобі языків і з єдного якбы центра ся розділює на вшыткых. І тым указує, же приход Святого Духа є новым початком той єдиности Нового Божого народу – святой Церькви. Она буде громадити в собі зо вшыткых народів.

І тота єдность указала ся і вонкашнім способом. Бо апостоли теперь наповнены Божов силов уж не боять ся ани Жыдів, ани пронаслідованя, ани смерти, але сміло голосять. А стало ся велике чудесне діло. Были там Жыде із різных народів, котры перебрали уж бісіду тых народів. А они вшыткы апостолів розумлять. Хоць они суть неукы, просты рыбарі із Ґалілеї, говорять о великых ділах Божых а вшыткы їм розумлять.

Так Святых Дух зышов і кликав вшыткых ку єдиности. Він є тот, котрый вытворять тоту правдиву єдиность в родині, в парохіі, в роботі, школі в народі. Святых Дух зышов не лем на апостолів, але зышов і на нас при святім крещіню і миропомазаню. А сходить і далше, коли Його не одоженеме гріхом з нашого сердця. Давать силу быти смілыма учениками Хріста, давать нам світло до нашого жывота, наповнять нас своїма дарами.

Просьме Го і днешній день, жебы наповинв нашы сердця своїм світлом, мудростьов, силов. Жебы сьме жыли добрый хрістіаньскый жывот. Были вірныма свідками і учениками Воскресшого Хріста і давали приклад і про іншых. Просьме Го каждый день молитвов: Царю небесный. Слава Ісусу Хрісту!

В неділю, 23. юна 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 23. юна 2024 р. о 12.00 год. і 24. юна 2024 р. о 2.00 год. за русиньскым часом.