«Слово» – Праздник Сошествія Святого Духа – неділя, 9.00 год.

Пережываме праздник святой Пятьдесятніці – Сошествія Святого Духа. Ісус перед своїм вознесіньом дав наказ ученикам порозходити ся по цілім світі і голосити Євангеліє. Но перед тым мали очековати приход Святого Духа.

На десятый день по Вознесіню сходить Св.ятый Дух в подобі огняных языків. Чом праві такый способ? Одповідь нам двать Боже слово в Старім Завіті.

Коли люде по потопі світа были єден язык і єден народ а здумали поставити вежу, котра буде аж до неба і збудовати собі імя. Тогды Хосподь помішав языкы, жебы перестали розуміти друг друга. Хотіли охабити по собі памятник, але без Бога, а насправді охабили по собі высміяня. Перестали будовати і порозходили ся по цілім світі.

А коли сходить Святый Дух, апостолы бісідують языком Святого Духа і вшыткы їх розуміли. Святый Дух їх наповнив і силов выдавати свідчіня о Хрістови. Наповнив їх мудорстьов, і они ішли і сміло проповідали Євангеліє. Там дішло ку розділіню, ту Святый Дух кличе ку єдности. А приходить в подобі огняных языків, бо апостолы мали своїм словом спальовати гріхы, а єдночасно запальовати любвов ку Хрістови вшыткых народів.

Обіцянка Святого Духа была дана і нам, і мы маме просити каждый день о наповніня Святым Духом, жебы сьме сміло свідчіли о Хрістови в конкретных сітуаціях нашого жывота.

В неділю, 4. юна 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 4. юна 2023 р. о 12.00 год. і 5. юна 2023 р. о 2.00 год. за русиньскым часом.