«Слово» – праздник Рождества св. Йоана Крестителя – неділя, 9.00 год.

Йоан Креститель мать в нашых літурґічных текстах різны тітулы: Пророк (бо як старозавітны пророкы переподвідали о приході Спасителя, подобно і Йоан явно о Нім говорив народу), Предтеча – опередник, (бо не лем проповідав о Нім но і опереджав його в часі. Не лем говорив о Нім, но і видів того, о котрім передповідав); Креститель – бо быв удостоєный, жебы Го покрестив на Йордані. Церьков празднує нелем його народжіня про небо, як у іншых святых, но і його народжіня на тоту землю. Євангеліє нам описує події, котры одбывали ся при народжіню Йоана. Архангел Гавриїл є посланый звістовати Захарії, же буде мати сына і кым він буде. Но він не увірив, зато чує од ангела слова – онімієш і не проречеш дочасу, бо єсь не увірив моїм словам, котры ся збудуть, як прийде час. А справды так ся і стало, аж при народжіню Йоана ся му розвязав язык і зачав пророковати. Так днешній день говорить нам о важности віры в Боже слово. Кідь не увірити ангелови несло зо собов таку кару, што повісти о слові самого Божого Слова, што зыйшло на землю, жебы нам звістовало слово од Отця. А Ісус говорить: не помине ся єдна йота, чарка в законі, покы ся вшытко не стало. Прото неприятелі нашого спасіня старають ся перекручовати, неґовати, злегшовати значіня Божого слова, жебы загасити в нас огень жывой віры. Но мы памятайме на слова Архангела, котры повів Захарії: Бо ты не увірив моїм словам, котры збудуть, як прийде час. Слава Ісусу Хрісту!

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА