«Слово» – Праздник Преображения – неділя, 9.00 год.

Пережываме праздник Преображенія. Ісус Хрістос бере трьох своїх учеників і апостолів – Петра, Якова і Йоана і выходить із нима на высоку гору. Там ся переобразив – змінив свою подобу.

Його тварь засвітила як сонце а ризы были білы як сніг. Появлюють ся Мойсей і Ілія і бісідують із ним. Затінює їх світла хмара, із котрой было чути голос: То є мій прелюбый Сын, його слухайте. Ученикы пали на землю і барз ся бояли, но Ісус їх піднимать і говорить їм: Не бійте ся, быв уж лем сам.

Ісус бере тых трьох, жебы пікріпити їх віру, коли увидять його роспятого, пониженого, мертвого, жебы познали, же тото вшытко Ісус бере на себе добровольні. Одкрывать їм із часткы свою славу. Мойсей і Ілія свідчать, же він є справды тот, котрый быв передозображаный законом і проповіданый пророками. Бо Мойсей реперезентує закон і Ілія вшыткых пророків. Сам Отець із неба засвідчує божество Ісуса, кедь го называть прелюбым Сыном, котрого маме слухати.

Но Ісус тыж тов подійов указує на славу першосотвореного чоловіка. Указує тыж славу його выбраных по його приході у славі судити вшыткых.

Так праздник є підкріпліньом не лем апостолів, але і нас. Коли пережываме тяжкости, проблемы, высміваня ці пронаслідованя – посмотьме на гору Тавор, на тоту славу, котру Ісус приготовив і нам, а котру лем трохы поодкрыв перед своїма учениками. А втогды тото вшытко буде про нас легкым. Слава Ісусу Хрісту!

В неділю, 23. авґуста 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 23. авґуста о 12.00 год. і 24. авґуста о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА